Shantazhet e Rusisë nuk kanë më peshë, bota e di se Putini ka frikë t’i përdorë armët bërthamore

14 Gusht 2023, 08:52, Blog Svitlana Morenets

Shantazhet e Rusisë nuk kanë më peshë, bota e di se Putini

Ndërsa Vladimir Putin u shmanget në përgjithësi kërcënimeve të hapura me armët bërthamore ruse, pasardhësit e tij janë shumë më pak elegantë në sjelljen e tyre. Që nga shkurti i vitit të kaluar, Dimitri Medvedev, ish-president i Rusisë, aktualisht zëvendëskryetar i Këshillit të Sigurimit, ka kërcënuar plot 60 herë Ukrainën dhe mbështetësit e saj në Perëndim, me përdorimin e armëve atomike.

Aktualisht 57 vjeç, Medvedev zë një rol të rëndësishëm në komunikimet strategjike të Rusisë, të fokusuara dukshëm te propaganda bërthamore. Detyra e tij është të thotë atë që nuk mundet ta shprehë dot publikisht Putinin. Pra t’i kujtojë botës se kush zotëron arsenalin më të madh bërthamor në botë, dhe ku mund të përdoret ai.

Por problemi është se tani askush nuk e merr më seriozisht. Sepse disa nga ato që pretendohen se janë “vija të kuqe” të Moskës janë shkelur nga Perëndimi, pa pasur një kundërpërgjigje nga ana e Rusisë. Prandaj, është një fakt që shantazhi bërthamor rus ka pushuar së funksionuari.

Në fakt, ai është shndërruar në një tregues gjysmë të dobishëm mbi gjendjen aktuale të Rusisë. Kërcënimet e Medvedevit pasojnë zakonisht dështimet e reja ushtarake ruse në fushën e betejës, dhe ndjekin refrenin e vjetër “nëse jemi në prag të humbjes së një lufte, atëherë ne kemi një buton të kuq që mund ta shtypim”.

Kur fundjavën e kaluar u përshkallëzua kundërsulmi i ushtrisë së Ukrainës, Medvedev u shfaq si “pararoja e Apokalipsit” në kanalin e tij "Telegram", duke e quajtur ushtrinë ruse të vetmen forcë që po shmang “ndezjen e zjarrit bërthamor global”.

Në ditët e para të pushtimit në shkallë të plotë të Ukrainës nga Rusia, Perëndimi e mori seriozisht këtë kërcënim: A nënkuptonte ndihma ndaj Ukrainës rrezikimin e fillimit të një lufte bërthamore? Por nuk u desh shumë imagjinatë për të parë një skenar alternativ po aq të tmerrshëm: nëse binte Kievi, atëherë radha do t’i vinte shteteve baltike, dhe ne do të përfundonim gjithsesi duke rrezikuar provokimin e një lufte bërthamore.

Të mbash me të mirë një agresor, mund të jetë akti më provokues nga të gjithë të tjerët. Perëndimi e gjeti guximin dhe u përball me Rusinë. Dhe çfarë ndodhi? Armët perëndimore u dërgua në sasi të mëdha në fushën e betejës. Ukraina shpreson që t’i bashkohet një ditë NATO-s kur të përfundojë lufta; dhe i vetmi ndryshim në qasjen bërthamore ruse, ka qenë transferimi i supozuar në Bjellorusi i disa armëve bërthamore taktike.

Por Rusia e zotëron tashmë aftësinë për të nisur një sulm bërthamor kudo që dëshiron. Ndaj nuk ka ndonjë logjikë ushtarake zhvendosja e disa raketave në Bjellorusi. Vlera e këtij lëvizjeje ishte thjesht psikologjike.

Pra Moska po përpiqet ta bindë Perëndimin se mbështetja e mëtejshme ushtarake dhe financiare për Ukrainën do të çojë në një përshkallëzim të situatës, dhe do të rrisë kërcënimin ndaj territorit të Ukrainës përmes lëshimeve të raketave, përfshirë ato me mbushje bërthamore.

“Armët bërthamore tashmë janë përdorur. Ne e dimë nga kush dhe ku, dhe kjo do të thotë se nuk ka më asnjë tabu!” - shkroi Medvedev në rrjetet e tij sociale. Por fakti që Moska ka vendosur të vendosë në tryezë “argumentin bërthamor”, vetëm sa po tregon se ushtria e saj ka dështuar në çdo aspekt, dhe se aktualisht Vladimir Putin nuk ka mënyra të tjera për të rritur presionin ndaj Ukrainës dhe aleatëve të saj.

Duke ngurruar të bëjë vetë kërcënime të drejtpërdrejta, ai ia delegon këtë detyrë Medvedevit, i cili duket se nuk e bën shumë mirë. Sepse është një fakt që kërcënimet e tij bërthamore, bëjnë rrallëherë bujë në mediat perëndimore. Madje ai shkakton tani më shumë tallje sesa frikë.

Ashtu si kërcënimet e rregullta të Koresë së Veriut se do të sulmojë një ditë Amerikën, ato shihen tani si pjesë e një fjalori të çmendur të përditshëm që vjen nga Moska. Ndërkohë atë e shpërfillin edhe zyrtarët ukrainas, që me ironi e këshillojnë të pijë më pak vodka përpara se të hapë profilin e tij në Telegram.

Përpjekja e Putin për ta pushtuar Ukrainën, ka rezultuar të jetë katastrofa më e madhe të presidencës së tij. Ai nuk mund të sigurojë dot një fitore ushtarake. E di se Ukraina nuk do të dorëzohet dhe nisë negociatat. Dhe po ashtu e di se lufta bërthamore do të ishte fundi i regjimit dhe jetës së tij. Sikurse e ka treguar kjo luftë, Putini është gati të sakrifikojë cilindo, por jo veten e tij./ Përshtatur nga CNA