E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Shqipëria, kundër BE-së: Drejtësi për Kosovën, ndryshe s'do të linjëzohemi me ju

27 Shtator 2023, 14:54, Aktualitet CNA

Shqipëria, kundër BE-së: Drejtësi për Kosovën,

Kryeministri Edi Rama

Kryeministri Edi Rama është shprehur i prerë lidhur me deklaratën e bërë nga Josep Borrell pas ngjarjes së ndodhur në veri të Kosovës.

Rama tha se nuk do të ketë linjëzim me BE-në deri në një deklaratë të dytë ku adresohen problematikat që kanë ndodhur, për të vendosur një drejtësi, një gjykim për ditët e fundit në Kosovë.

Gjithashtu, kryeministri shqiptar nuk la pa përmendur as aktin e rëndë të Serbisë lidhur me shpalljen e një dite zie për kriminelët e vrarë në Kosovë.

Sipas Ramës me këtë Serbia heroizon angazhimin e një grupi kriminal për të ushtruar terror në veriun e Kosovës.

“Deklarata e BE-së është një deklaratë që, jo se ka problem në vetvete pasi adreson gjithçka që është thënë më parë nga Borrell, por ka një problem të madh, që nuk i përgjigjet realitetit të ditëve të fundit. Dhe ne e kemi të pamundur të linjëzohemi me Bashkimin Evropian pa parë një deklaratë të dytë që adreson problematikën e ditëve të fundit që është vrarë një efektiv i policisë së Kosovës nga një grup kriminal që donte të ushtronte terror në veri të Kosovës, gjë që është pasuar nga shpallja e një dite zie në Beograd. Për ne është e papranueshme, e pajustifikueshme, madje e dënueshme sepse është joevropiane dhe sepse është sinjali më i keq që Serbia mund të jepte për rajonin dhe Evropën. Kemi kërkuar që Bashkimi Evropian të vërë alarmin për t’i kthyer mesazhin e duhur që vjen nga shpallja e zisë kombëtare në Beograd. Deri në momentin kur nuk do të ketë një deklaratë të dytë të BE-së për të vendosur një drejtësi, një gjykim për ditët e fundit ne nuk do të linjëzohemi. Nëse deklarata e dytë e bën këtë që kërkojmë, ne linjëzohemi me deklaratën e parë. Ne nuk u heqim asnjë presje kërkesave të BE-së të Kosovës. Linja jonë është linja e BE-së dhe Komunitetit Atlantik, por është momenti të dënohet ajo që ndodhi në veri të Kosovës dhe ajo që u pasua në Beograd me shpalljen e një dite zie kombëtare që heroizon angazhimin e një grupi kriminal për të ushtruar terror në veriun e Kosovës.”

Rama e bëri këtë deklaratë gjatë konferencës për shtyp me e Zv/kryeministrin dhe ministrin e Jashtëm italian, Antonio Tajani./ CNA