Mijëra besimtarë festojnë Pashkën në Korçë/ Mesazhe paqeje dhe shprese nga Katedralja “Ngjallja e Krishtit”

12 Prill 2026, 10:20, Aktualitet CNA

Mijëra besimtarë festojnë Pashkën në Korçë/

Mijëra besimtarë ortodoksë u mblodhën në Katedralen “Ngjallja e Krishtit” në Korçë për të festuar Pashkën, një nga ditët më të rëndësishme të kalendarit fetar. Qyteti, i njohur për traditat e tij të thella shpirtërore, u shndërrua në një qendër të bashkimit dhe lutjes. Mesha e shenjtë u drejtua nga mitropoliti i Korçës, Imzot Anastasi, i cili në mesnatë shpalli “Ringjalljen e Krishtit”. Nën tingujt e kambanave dhe dritën e qirinjve, besimtarët përcollën mesazhin e shpresës: “Krishti u ngjall, vërtet u ngjall”.

Sheshi përpara Katedrales dhe pedonalja e qytetit u mbushën me qytetarë dhe vizitorë nga mbarë vendi e diaspora, të cilët morën pjesë në këtë ceremoni të veçantë, duke marrë dritën e Pashkës si simbol besimi, paqeje dhe mbarësie për familjet e tyre.

"Për shqiptarët dhe veçanërisht për korçarët, gëzuar Pashkën! Paqe, harmoni dhe sa më shumë bekime në familjet e tyre. Unë jetoj në Tiranë, por jam korçare dhe kam ardhur për Pashkë. Si çdo vit, atmosfera është një mrekulli më vete, sepse kjo festë sjell paqe për të gjithë njerëzit. Nesër patjetër që do festojmë me familjen."

Traditat e festimit vijojnë edhe në familje, ku tryezat mbushen me gatime tradicionale dhe simbolika të trashëguara ndër breza.

"Gëzuar! Shëndet, mbarësi e dashuri midis njerëzve. Flaka simbolizon dashurinë e Krishtit për njerëzit. Si traditë, ne festojmë në familje, e çojmë mishin për të pjekur, kemi marrë edhe bukën me qiqra dhe e festojmë në familje."

"Në të vërtetë, veza duhet të çahet, sepse thonë që kur veza çahet, hapet koha. Do festojmë në vendin tonë të lindjes. Ne kemi ardhur nga Gjermania, por jemi nga Korça. Gëzuar Pashkën! Krishti u ngjall dhe u uroj të gjithë shqiptarëve të kenë shëndet, sepse është diçka që varet vetëm nga Zoti dhe çka t’i dojë zemra."

Ashtu si çdo vit, Korça mbetet një nga pikat më të rëndësishme të festimeve të Pashkës në vend, ku besimi, tradita dhe bashkimi marrin kuptim të veçantë.

"Gëzuar për shumë vjet! Shëndet e mbarësi për të gjithë. Do ta festojmë të dielën në familje. Drita simbolizon ngjalljen e Krishtit. Paçi shëndet e mbarësi të gjithë."

"Krishti u ngjall! Vërtet u ngjall! Le të jetë kjo ditë dita e paqes, e gëzimit dhe e besimit!"

Në një atmosferë të mbushur me dritë dhe shpresë, besimtarët e çojnë këtë mesazh në shtëpitë e tyre, duke e kthyer Pashkën në një festë që bashkon dhe frymëzon./ CNA