Mesha e Pashkëve ortodokse/ CNA transmeton sonte drejtpërdrejt festimet në Tiranë dhe Korçë

11 Prill 2026, 13:10, Aktualitet CNA

Mesha e Pashkëve ortodokse/ CNA transmeton sonte drejtpërdrejt

Besimtarët ortodoksë do të kremtojnë nesër ditën e Pashkëve. Mbrëmjen e sotme CNA do të transmetojë drejtpërdrejt meshën tradicionale që mbahet në mesnatë në Katedralen “Ngjallja e Krishtit” në kryeqytet, ku qindra besimtarë marrin pjesë për të ndjekur ritualin fetar. Në Tiranë, mesha do të drejtohet nga Fortlumturia e Tij Joani, Kryepiskop i Tiranës, Durrësit dhe i Gjithë Shqipërisë.

Po ashtu, në CNA do të ndiqni edhe shërbesën e “Ngjalljes së Krishtit” të zhvilluar në Katedralen “Ngjallja e Krishtit” në Korçë, një nga qytetet kryesore të juglindjes dhe gjithë Shqipërisë, e cila zhvillon festime të veçanta në këtë ditë të shënuar për të gjithë besimtarët ortodoksë. Në Korçë, mesha do të drejtohet nga Mitropoliti i Korçës, Hirësi Anastasi.

Kjo meshë është momenti kulmor i gjithë Javës së Madhe dhe përjetohet me shumë përkushtim nga besimtarët ortodoksë. Festime për Pashkët ortodokse do të ketë jo vetëm në Tiranë dhe Korçë, por edhe në Berat, Elbasan dhe në gjithë vendin.

Mijëra besimtarë ortodoksë në Tiranë morën pjesë pasditen e djeshme në ceremoninë e daljes së epitafit. Kjo ceremoni, një nga momentet më të rëndësishme të Javës së Madhe, përfshiu edhe procesionin solemn të epitafit, i cili u ndoq nga një numër i madh besimtarësh në kryeqytet. Procesioni, që u zhvillua në rrugët pranë Katedrales Ortodokse “Ngjallja e Krishtit”, u drejtua nga Kryepiskopi i Tiranës, Durrësit dhe i Gjithë Shqipërisë, Fortlumturia e Tij Joani.

Ndërsa këtë të shtunë, Fortlumturia e Tij, Kryepiskop Joani dha mesazhin e tij për festën, ku theksoi se bota sot po përballet me luftëra, frikë dhe pasiguri, ndërsa në mes të këtyre sfidave mesazhi i Krishtit mbetet i njëjtë, paqe dhe shpresë. /CNA