web counter
LEXO PA REKLAMA!

SHKARKO APP

App Store
Google Play

Kush është Lul Morina/ Pronari i pallatit të sekuestruar, ortak i dy vëllezërve mashtrues indianë

8 Shtator 2022, 17:07, Aktualitet CNA
Kush është Lul Morina/ Pronari i pallatit të sekuestruar, ortak i
Julian Morina, i njohur si Lul Morina

Julian Morina, i njohur si Lul Morina, është pronari i pallatit 9-katësh që u sekuestrua sot në zonën e Farkës nga Qeveria, pasi rezultonte si ndërtesë pa leje.

Kërkesa e Morinës për legalizimin e ndërtesës që dy kate i ka nën tokë, ishte refuzuar, por duket se kjo nuk e ka penguar biznesmenin të ndërtojë një pallat pa leje.

Lul Morina është denoncuar edhe më parë nga mediat për ndërtim pa leje. Për të është raportuar disa vite më parë se kishte ndërtuar pa leje në Dhërmi, nën neglizhencën totale të autoriteteve shtetërore.

Biznesmeni ndërtoi resortin “Drymades Dream” në ortakëri me dy vëllezërit indianë që kërkoheshin ndërkombëtarisht për pastrim parash, Nitin Sandesara dhe Chetankumar Sandesara.

Sipas dokumenteve zyrtare, rezulton se Julian Morina i kishte shitur 50% të aksioneve të resortit kompanisë “Laxmi Reale Estate & Investment”, kompani kjo që zotërohej nga dy vëllezër indianë.

Kush është Lul Morina/ Pronari i pallatit të sekuestruar, ortak i
Dokumenti i ortakërisë

Morina i mbrojti lidhjet e tij me familjen Sandesaras për OCCRP duke u përgjigjur se ato ishin “të persekutuar nga shteti i tyre për qasjet politike dhe unë i besoj që janë njerëz të ndershëm.”

Nga ana tjetër, Lul Morina njihet për jetën e luksit. Ai hapi një kompani ndërtimi në vitin 2005. Bizneset e tij u rritën ndjeshëm nga viti 2013, ku ai u bë sponsor i ekipit të futbollit “Tirana”.

Por ditën e djeshme, kreu i qeverisë paralajmëroi prishjen e një prej hoteleve të tij. Rama deklaroi se pallati pa leje i Morinës, ishte marrë nën mbrojtje nga një shef komisariati./ B.A. – CNA.al





Lajmet e fundit nga