E fundit!

19:10 Politikë

Ndryshimet nga Reforma/ Zbardhen 4 skenarët e mazhorancës për riorganizimin territorial

Raporti i hartuar nga mazhoranca për Reformën Administrati...

Fshatrat e braktisur, realiteti shqiptar që po shkon drejt thellimit

25 Korrik 2026, 18:31, Aktualitet Iris Beqiri

Teksa rastis të lëvizësh nëpër fshatrat e Shqipërisë, peizazhin e këndshëm që krijon natyra duket sikur e sfumojnë disa shtëpiza bosh, dyert e vjetra dhe muret që mezi mbahen.

Braktisja e fshatrave është një realitet që haset shpesh në Shqiperi, e që duket se po thellohet dita-ditës.

Mungesa e vendeve të punës, të ardhurat e ulëta nga bujqësia e blegtoria, infrastruktura e dobët dhe shërbimet e kufizuara kanë detyruar banorët e shumë fshatrave në vend që të konsiderojnë mundësitë e jetesës tjetërkund, ku padyshim Tirana si metropol është ndër zgjedhjet e tyre.

Braktisja e fshatrave ka pasoja jo vetëm sociale dhe ekonomike, por e shoqërohet edhe me rreziqe të shumta demografike. Nga viti në vit, gjithnjë e më shumë banorë, veçanërisht të rinjtë, po largohen drejt qyteteve ose edhe jashtë vendit, në kërkim të mundësive më të mira për punë dhe një standard më të lartë jetese.

Si rrjedhojë, shkollat në këto fshatra janë drejt mbylljes, pasi numri njëshifror i nxënësve nuk lë zgjidhje tjetër, aktiviteti ekonomik është tkurrur, ndërsa tokat bujqësore janë lënë dierrë.

Po ashtu, ky fenomen po krijon edhe pasoja kulturore, pasi me largimin e banorëve, traditat, zanatet dhe trashëgimia e këtyre zonave rrezikojnë të humbasin.

Banorët e mbetur në fshatrat që po braktisen kërkojnë më shumë investime në infrastrukturë, bujqësi, turizëm rural dhe shërbime publike, me shpresën se këto masa mund të ndihmojnë në rikthimin e jetës në fshatra dhe krijimin e mundësive më të mira për brezat e rinj.

E ardhmja e shumë fshatrave në Shqipëri duket sikur ‘varet në një fije peri’, ndërsa sfida për të frenuar braktisjen vazhdon të jetë një nga çështjet më të rëndësishme për zhvillimin e zonave rurale dhe hap debat për rolin e politikave sociale dhe jo vetëm, që mund të çojnë në përmbysjen e këtij fenomeni./CNA