Gjurmët e Hafiz Emin Cangonjit, kryetari i lagjes më të vjetër të Korçës

24 Korrik 2026, 20:23, Kulturë Aleksandër Cangonja

Gjurmët e Hafiz Emin Cangonjit, kryetari i lagjes më të

Në hulumtimet në Arkivin Qendror Shtetëror, saktësisht në Fondin 153, gjeta një dokument me shumë vlera për mua. Ky dokument arkivor hedh dritë mbi figurën e stërgjyshit tim (babait të gjyshit), Hafiz Emin Cangonjit, i cili në shkresat zyrtare të kohës shënohet sipas patronimit si Hafiz Emin Musa.

Dokumenti i datës 23 Tetor 1921 është një "Letër Propozimi". Përmes këtij akti, banorët dhe krerët e komunitetit u mblodhën për të votuar dhe zgjedhur Kryetarin (Myftarin) e ri të lagjes së tyre, pas ndarjes nga jeta të paraardhësit, Abidin Veliu.

Besimi i komunitetit i udhëhequr nga "ndërmjetësit" e lagjes iu delegua pikërisht Hafiz Emin Cangonjit. Ai u zgjodh Kryetar i lagjes më të vjetër, më të rëndësishme dhe historike të qytetit: Lagjes së Sahatit. Kjo zonë përbënte zemrën e vjetër të Korçës, ku lartësohej jo vetëm Kulla e Sahatit, por edhe Xhamia e Iljaz Bej Mirahorit — objekti i kultit dhe monumenti më i vjetër arkitekturor i të gjithë qytetit, i ndërtuar që në agimin e themelimit të Korçës.

Lidhja e stërgjyshit me këtë pjesë të shenjtë të qytetit ishte e hershme dhe e përditshme. Hafiz Emini e kishte shtëpinë e tij fare pranë kësaj qendre dhe shërbente si klerik e punonte pikërisht në Xhaminë e Iljaz Mirahorit, duke gëzuar një respekt të jashtëzakonshëm mes bashkëqytetarëve për integritetin dhe dijeni e tij. Pasi banorët hodhën firmat e tyre dhe e zgjodhën me votim unanim, ky vendim popullor u përcoll zyrtarisht për aprovim në Prefekturën e Korçës, duke u vulosur e protokolluar si një akt legjitim i shtetit shqiptar.

Sot, ky dokument i më bën krenarë. Ai dëshmon se si stërgjyshi ynë, Hafiz Emin Cangonji, la gjurmët e tij të pashlyeshme në organizimin civil dhe shpirtëror të Korçës, duke udhëhequr me nder lagjen që ngriti themelet e qytetit tonë.

Transkipti i dokumentit:

Letër – Propozimi: Për Myftar dhe antarë të famulisë sè Sahatit.
Duke pare se famulia jonë “Sahat” mas vdekjes të myftarit Abidin Veliut mbeti pa myftar, dhe dyke ndjer ndevojen e nji myftari për t’u për kujdes për famulinë tone, të nënëshruarit në mbledhjen që bëmë sot më 23 tetor 1921 për këtë çështje me pranimin e gjithë ndejnjësve të famulisë tone vendos’më për myftar Hafës Emin Musa dhe anëtarë Z.Z. Belul Lytfi dhe Riza Kadi Dërsniku të cilët që të tre janë njeres të nderçëm dhe të zotrit me mbane deyterat qe i përkasin.
Prandaj për t’u pranuar zyrtarisht dhe për t’u dhënë Vula e famulise me dëshirën e të gjithëve shkruhet kjo letër propozimi e cila i paraqitet Prefekturës për pranimin e të përmendurve.

Korçë me 23 Tetor 1921

Nëpunësit e famulisë Sahat.
Nënshkrimet dhe Emrat
• Hafës Emin Musa
• Emin Seizniku
• Nazim Idris
• Belul Lytfi
• R. Kadi
• Memet
• Haxhi Musa (H. Emin)
• Abidin ...
• Abidin Gashi
• Osman Zyber
• Balil ….
• Fuad D...
Prefektur’ e Korçës
V. Nr. 4447
Drejtor. të Policis për anketë mbi moralë e të propozuarve këshillë dhe në kanë kualitetet e duhura ligjore.
K. më 24.10.21
Pref. i Korçës
(Firma)
________________________________________
Drejtoris e Policis
Prefekturës
Këtu
Marrim nderë t'u njoftojmë si pas anqetit të bëmë Kryeplaku i Lagjes Sahat ashtu dhe anetarët janë të Ndershëm për detyrat që u-zgjodhë jemi të mendimit që të pranohen.
K. 29.10.21
Drejtor' i Policis
Nik. Dishnica
Drejtorja e Policies
Komiseri
Për anqetë mbi Zoterintë që janë zgjedhur nga ndenjësit
e famulis Sahat nji-1- Myftar dhe 2 Anetarë.
K. 28.10.21
Drejtor' i Policies
Nik. Dishnica
Pref. e Korçës
Nr. —
Shërb. të Arqivës
Pranohet dhe ti bëhet emërimi.
K. më 31.10.21
Pref. i Korçës
(Firma)
Drejtorja e Policies
Nro 3091
N/Komisarit Tregut
Njoftoni familjen e përmendur, që të propozojnë nji tjetër në vend të djalit Abidin, se është
nga mosha e vogël.
Për Drejtor' i Policies
(Firma)
Korçë, 5/12/21
Komisaria e Korçës
Drejtoris Policies

Marim nderë t'ju bëjmë të njohturë pas anqetit që rrodhi mbi Kryeplakun
dhe Këshilltarjet që kanë propozuarë famullia Sahatitë Janë nga morali dhe nga karakteri të
pëlqyerë dhe gati me pranu dhe jemi të mendjes që të pranohenë Kryeplaku dhe të dy 2 anëtarët
me nderë
Komisari(Firma)