web counter
LEXO PA REKLAMA!

SHKARKO APP

App Store
Google Play

E fundit!

x

Fati i të zhdukurve/ Sula: Kemi gjetur dokumentacion për të burgosurit në Spaç

9 Qershor 2023, 22:50, Aktualitet CNA

Fati i të zhdukurve/ Sula: Kemi gjetur dokumentacion për të

Autoriteti për Informim mbi Dokumente të ish-Sigurimit të Shtetit njoftoi pak ditë më parë se ka nisur hetim administrativ për të hedhur dritë mbi fatin e të zhdukurve në burgun e Spaçit.

Për këtë hetim ka folur mbrëmjen e sotme kryetarja Autoritetit të Dosjeve, Gentiana Sula, e cila tha se gjithçka nisi nga denoncimet e familjarëve të viktimave.

Në një intervistë me Merita Haklajn, Sula tha se Autoriteti i Dosjeve ka gjetur dokumentacion të rëndësishëm që ka qartësuar fatin e shumë të dënuarve.

Ajo garantoi se institucioni që drejton është në gjendje të sigurojë konfidencialitet për personat që japin informacion.

“Çështja e të pagjeturve ishte diçka me të cilën ne u përballëm me krijimin e institucionit. Familjet filluan të vinin të na trokasin në derë, sepse ishin lënë vetëm nga institucionet. Ajo që ne kishim përpara ishin fatet e familjarëve, që kërkonin të gjenin të afërmit e tyre.

Duket sikur nuk ka dokumente, por nga tjetër, në disa raste, ne kemi gjetur dokumentacion të rëndësishëm që qartëson fatin e të dënuarve. Jo vetëm kaq, por institucioni është në gjendje që të garantojë edhe konfidencialitetin e personave që japin informacion.

Me rastin e përvjetori të revoltës së Spaçit, duke mbledhur dëshmitë e personave, ku u morën dëshmitë e 50 ish-të dënuarve dhe familjarëve, që po kërkonin të pagjeturit e asaj zone, filloi të dukej qartë konvergimi i të dhënave që ato po jepnin.

Dokumentacioni i mbledhur filloi të na tregonte qartë që të paktën në katër vendvarrime dyshimet janë shumë pranë se mund që aty mund të ketë vërtet mbetje mortore të personave. Dhe jemi më afër se kurrë, sepse kemi mjete.

Dhe kemi marrë vendimin që për këto 44 persona dhe për këto katër vendvarrime, këtë muaj është afati fillestar, dhe mendoj që kjo do na tregojë edhe sfidat, që natyrisht do t’i bëjmë të ditura te institucionet përkatëse”, theksoi Sula./ CNA.al





Lajmet e fundit nga