5.2 milionë pasagjerë për vitin 2022/ Belinda Balluku zbulon objektivin e radhës

30 Dhjetor 2022, 14:48, Aktualitet CNA

5.2 milionë pasagjerë për vitin 2022/ Belinda Balluku zbulon

Ministrja e Infrastrukturës dhe Energjetikës, Belinda Balluku

Zëvendëskryeministrja njëkohësisht dhe ministrja e Infrastrukturës dhe Energjetikës, Belinda Balluku, ka kryer sot inspektim në aeroportin “Nënë Tereza”, ku janë marrë të gjitha masat për të përballuar fluksin e pasagjerëve në këtë fundvit.

Balluku bën me dije se nuk ka as radhë dhe as problematikë, dhe kjo vjen si pasojë e shtimit të kapaciteteve, duke përmendur ngritjen e terminalit të ri dhe shtimin e pikave të kontrollit kufitar që janë bërë gjatë vitit 2022. Ndër të tjera Balluku bëri me dije se kemi 5.5 milionë pasagjerë për vitin 2022, një numër ky i parashikuar vite më parë.

“Sivjet kemi arritur që të kemi terminalin e ri edhe tani që po inspektojmë edhe te pjesa e sigurisë dhe te katet e daljes nuk shikojmë që të ketë as radhë as problematikë dhe kjo vjen për shkak të shtimit të kapaciteteve, pra nga ngritja e terminalit të ri dhe te shtimi i pikave të kontrollit kufitar që janë bërë gjatë vitit 2022, që janë dy evente të shënuara për ta bërë procesin sa më fleksibël dhe pa probleme. Ndërkohë kemi 5.2 milionë pasagjerë për 2022”, është shprehur Balluku.

Balluku ka nënvizuar se një nga objektivat e ardhshme, është që t'u jepet mundësi pasagjerëve që të mos detyrohen të kontrollohen dhe në pika të tjera kontrolli në aeroportet europiane.

Për ta bërë këtë, Balluku thotë se duhet një investim nga ana e koncensionarit serioz dhe i fuqishëm në fushën e sigurisë.

“Ajo që është e rëndësishme është që duam t'iu japim mundësi pasagjerëve shqiptarë që të mos detyrohen edhe të kontrollohen edhe në pika të tjera kontrolli europiane, pra kur shkojnë në aeroportet europiane. Por për të bërë këtë do të duhet një investim nga ana e koncensionarit serioz dhe i fuqishëm në fushën e sigurisë shpresoj që koncensionari t’iu qëndrojë të gjitha detyrimeve dhe angazhimeve që ka ndërmarrë që deri tani e ka bërë qoftë me ndërtimin e terminalit të ri, qoftë me kushtet që po përmbushen sa i përket cilësisë së shërbimit, por edhe siguria është e rëndësishme pasi ne si udhëtarë do të dëshiromin që kur të shkonim në vendet e tjera të BE-së, të mos kontrolloheshim nga e para”, tha Balluku./ CNA.al