PD e ndare pro dhe kunder LSI-se

1 Gusht 2015, 19:37, Opinione CNA

Nga Mero Baze

Botuesi i gazetës 55 Fahri Balliu, është vënë nën kritika të forta dhe ironi pa fund nga media online brenda Partisë Demokratike për shkak të një interviste të tij, ku shikon si zgjidhje reale të ardhjes së PD-së në pushtet një koalicion me LSI-në dhe një ndëshkim të njerëzve që Basha afroi në këtë fushatë, por që dështuan.

Sulmet ndaj Balliut, vijnë sidomos për shkak të tezës së tij për alencë të mundshme të PD-së me LSI-në, që siç e ka zakon Fahriu në raste të tilla, i dekoron me ?interesin kombëtar?.

Edhe pse nuk jam i prirur të marr seriozisht Fahriun në këtë rast, ne duhet të vendosim nëse duhet të marrim seriozisht Lulzim Bashën apo jo.

Teza e rindërtimit të koalicionit të PD-së me LSI-në, ka qenë teza themelore e Lulzim Bashës në garën kundër Sokol Olldashit në Korrik të vitit 2013. Edhe pse kishte ende një muaj nga humbja e thellë e 23 Qershorit, Basha e shikonte këtë humbje, si një humbje aritmike dhe jo politike. Ai fajësonte atë për humbjen e alencës me LSI-në dhe e kishte tezë themelore rikuperimin e kësaj aleance. Olldashi kishte tezën e kundërt, atë të konsiderimit të LSI-së kundërshtare politike dhe betejën për një opozitë morale.

Të gjithë ata që mbështesnin Bashën atëherë ishin po me këtë tezë. Dy vjet më pas, i vetmi njeri konseguent, nga gjithë PD-ja dhe grupi i Bashës, që vazhdon të mbroj qëndrimet e tij është Fahri Balliu. Të tjerët, dmth mbështetësit e tjerë të Bashës duhet të kthejnë kokën dhe të shikojnë çfarë kanë thënë e shkruar kur mbronin Bashën dhe tezat e tij dy vjet më parë.

Nga ana tjetër, të njëjtët që duken të egërsuar me Fahri Balliun, që është për një rikuperim të aleancës PD-LSI, janë duke futur nëpër media mundësitë e një aleance PD-PS për të eleminuar LSI-në. Pra në këtë kontekst, i gjithë evolimi i PD-së këto dy vjet është nga një parti kundër PS-së, në një parti pro dhe kundër LSI-së. Një pjesë e urrejnë dhe duan të bëhen me PS-në ta shkatërrojnë, një pjesë e adhurojnë dhe duan të bëhen aleate me të që të fitojnë pushtetin. Kjo shkretëtirë idesh në PD dhe mungesë fantazie për të bërë opozitë, ka bërë që gjithë opozita dhe ata që formojnë opinionin rreth saj, të merren me një fushatë idiote, ku synojnë ose ?të nxisin sherre? mes PS-së dhe LSI-së, ose të ?frikësojnë? LSI-në se do bëhen bashke me PS-në kundër saj.

Kjo mënyrë të sjelluri nuk bën asgjë tjetër, veçse bën LSI-në forcë udhëheqëse të PD-së, nga e cila varet fati i saj në të ardhmen. Kjo reflektohej nëse e vije re dhe në fushatën e fundit elektorale. Bateritë kryesore të Bashës dhe Berishës u përqëndruan kundër LSI-së dhe betejat më të forta politike u bën kundër saj. Kundër saj u bë betejë politike në Vorë, në Lezhë, në Pogradec dhe thuajse gjithë akzuat për manipulime u vërtitën nga PD-ja kundër LSI-së. Jo se nuk ka pasur vend për debate dhe betejë kundër LSI-së, por motivi që e ka shtyrë PD-në të hyjë në atë fushatë janë idetë foshnjore se kështu do t?i rrisim paranojën Ilir Metës, se kjo luftë po bëhet në bashkëpunim me PS-në.

E njëjta betejë po vazhdon dhe tani. PD-ja është ndarë në një parti pro dhe kundër Ilir Metës dhe LSI-së dhe kjo e bën fatin e saj të prekshëm dhe të diktueshëm jo nga vota e demokratëve, por nga vizioni i LSI-së dhe Ilir Metës.

Ndër ta, Fahri Balliu është më i sinqerti dhe konseguenti. Ai e ka përjetuar humbjen e 23 Qershorit si humbje të mikut të tij Ilir Meta dhe ka qenë mbështetësi kryesor i Bashës dhe luftëtari kryesor kundër Olldashit, mbështetur mbi këtë tezë. Këta që e sulmojnë kanë bërë të njëjtën gjë, vetëm se tani nuk duan ta kujtojnë.