web counter
LEXO PA REKLAMA!

SHKARKO APP

App Store
Google Play

Proteinat në gjak mund të paralajmërojnë kancerin 7 vjet para diagnozës

15 Maj 2024, 15:04, Shëndeti CNA

Proteinat në gjak mund të paralajmërojnë kancerin 7 vjet

Shkencëtarët nga Universiteti i Oksfordit kanë identifikuar proteina në gjak që mund të paralajmërojnë kancerin më shumë se shtatë vjet përpara diagnozës.

Studiuesit gjetën 618 proteina të lidhura me 19 lloje kanceri, duke përfshirë kancerin e zorrës së trashë, prostatës dhe gjirit.

Rreth 107 proteina u gjetën në një grup njerëzish, gjaku i të cilëve u mblodh të paktën shtatë vjet para diagnozës, dhe ky zbulim mund të jetë një "hap i parë vendimtar" drejt terapisë parandaluese, raporton "Sky News".

Dy studime, të financuara nga grupi "Cancer Research UK", tregojnë se prania e disa proteinave mund të ketë një efekt në formimin e qelizave kancerogjene.

“Për të qenë në gjendje të parandalojmë kancerin, duhet të kuptojmë faktorët që nxisin fazat më të hershme të zhvillimit të tij. Tani kemi teknologjinë për të parë mijëra proteina në mijëra kancere, duke identifikuar se cilat proteina luajnë një rol në zhvillimin e kancereve specifike dhe cilat mund të kenë efekte që janë të zakonshme për lloje të shumta kanceri", tha profesoresha Ruth Travis.

Drejtori ekzekutiv i "Cancer Research UK", Ian Fox, theksoi se parandalimi i kancerit do të thotë të jesh i vetëdijshëm për shenjat më të hershme paralajmëruese të sëmundjes dhe se këto studime do të ofrojnë hapin e parë drejt gjetjes së trajtimeve parandaluese.

Shkencëtarët theksuan se nevojiten kërkime të mëtejshme për të zbuluar rolin e saktë të proteinave në zhvillimin e kancerit dhe cilat proteina duhet kërkuar. Është gjithashtu e nevojshme të punohet në zhvillimin e testeve për zbulimin e proteinave dhe barnave që mund të përdoren për trajtimin e tyre. 

Rezultatet e hulumtimit u publikuan në revistën "Nature Communications"./CNA 





Lajmet e fundit nga