web counter
LEXO PA REKLAMA!

SHKARKO APP

App Store
Google Play

E fundit!

x

Kapter Fania me grup artistik/ Këshilla “brilante” e Robert Zarit

2 Qershor 2022, 08:22, Satire CNA

Kapter Fania me grup artistik/ Këshilla “brilante” e Robert

Kapter Fania ngre grup artistik. Ia shtiu ndër mend Robert Zari.

-Të kam gjetur një mënyrë si të shlyesh borxhet,-i tha ai.

Sa dëgjoi “shlyerje borxhi” Fania i ngriti veshët si ata zagarët e gjahut sapo dëgjojnë zhurmën e çiftes.

-Ti ke një resort në bregdet. Atje,kur ka pushues vijnë e japin koncerte artistë nga Tirana apo Kosova. Madje dhe kur organizohen dasma a fejesa atje kërcet muzika deri në mëngjes. E ata marrin si shpërblim goxha para, pa le shuma që derdhet përtokë në vallen e Napolonit. E mbledhin me fshesë.

-Dhe?-pyeti Kapteri.

-Dhe ndaloji ata. Mos i lejo të vijnë. Ngri vetë një grup artistik e gjithë paratë që do grumbullosh çoji në bankë. Shlyej këstet.

-Dale, dale,-foli Fania.-Po kush do këndojë?

-Do këndojnë ata që ti i ke të punësuar në TV,në gazeta e kudo. Pra nuk u jep as shpërblim. Se ata marrin rrogën tek ty.

-E kështu i bie që do këndosh dhe ti p.sh!-u kthjellua Fania.

-Po, edhe unë,-tha Rakip Zari.-Po më i saktë jam në valle, sidomos devolliçen e qaj.

Kaq qe biseda. Fanies iu ngrit mendja .Mblodhi të punësuarit e tij dhe ia nisi:

-Vajzat e gjata, çunat e gjatë e elegantë të dalin majtas se do bëhen balerina e balerinë. Ata të shëndoshët djathtas se do këndojnë. Do bëni prova dy javë e korrik-gusht koncert te resorti im. Ai ose ajo që heziton të largohet, është e pushuar.

Po nuk bëzajti kush. Ata heshtin për lajmet fake që japin çdo herë që ua kërkon Fania e jo më për ca këngë e kërcime.

Kapter Fania ndjek provat. Ka ditë që po mendon për emrin e grupit artistik. Ta quajë “Jazz Kapteri”,”Fane and Art”, apo “Tunde vëlla,tunde!”

Po nuk nxitohet. Ka kohë deri në korrik.

-Bankë më prit! Do të të bëj me turp!-gati bërtet me zë Dhe i fërkon leshtë e kokës Rakip Zarit.





Lajmet e fundit nga