web counter
LEXO PA REKLAMA!

SHKARKO APP

App Store
Google Play

E fundit!

x

Vau Dejës, një oaz me shumë të fshehta…

27 Korrik 2022, 21:50, Qyteti im CNA
Vau Dejës, një oaz me shumë të fshehta…
Piesazh nga Vau i Dejës

Që nga peizazhet fantastike të liqenit, te restorantet me meny tradicionale anës tij, monumentet e shumta historike e kulturore, Vau i Dejës është kthyer në një destinacion mjaft të preferuar për ata që adhurojnë natyrën dhe duan të eksplorojnë bukuritë e saj të pafundme.

Liqeni i Vaut të Dejës është një tjetër arsye madhore për të vizituar këtë zonë. Formuar në vitin 1971 nga ujëmbledhësi i Drinit, liqeni zgjatet nëpër gryka malesh, duke e bërë mjaft tërheqës peizazhin. Sipërfaqja e liqenit është 24.7 km, dhe ka një thellësi prej 52 metrash dhe në të është ngritur hidrocentrali i Vaut të Dejës. Që nga peshkimi, te shëtitjet me varka, mundësitë për të kaluar kohën tuaj këtu janë vërtet të shumta.

Vau Dejës, një oaz me shumë të fshehta…

Qyteza antike e Sardës është ende një vend i pazbuluar në pritje të vizitorëve, të cilët duan të njihen me vendin ku jetoi princi Lekë Dukagjini dhe familja e tij, por edhe për të parë nga afër rrënojat e kishave të vjetra mijëravjeçare që kanë arritur të mbijetojnë deri në ditët e sotme. Dikur në këtë vend thuhej se kishte shumë kisha, por sot kanë mbetur 10 të tilla të cilat mund t’i shohësh të tëra përmes një udhëtimi rreth e qark ishullit. Për të shkuar aty duhet varkë, e cila mundësohet nga operatorët turistikë, të cilët operojnë në liqenin e Vaut të Dejës. Këta të fundit thonë se vitet e fundit ka patur një interes të shtuar si nga vizitorët vendas, ashtu edhe të huaj.

Vau Dejës, një oaz me shumë të fshehta…

Në total gjatësia e ishullit nga njëri skaj në tjetrin është 393 metra, teksa kodra kap lartësinë e 130 metrave. Ishulli arrihet lehtësisht dhe nga fshati Rragam, që ndodhet vetëm 6 kilometra larg.

Sot në ishull mund të admirohen rrënojat e qytetit mesjetar, që dikur njihej me emrin e Sardës, sot si Ishulli i Shurdhahut (apo edhe Kalaja e Shurdhahut). Aty bashkohen kulturat e ndryshme të Malësisë, Mirditës apo Zadrimës dhe është një vend eksplorimi mjaft interesant për antropologët. Helidon Sokoli, udhërrëfyes, njëkohësisht edhe specialistë në Drejtorinë Rajonale të Kulturës Shkodër thonë se Sarda ka patur dhe një numër mjaft të madh kishash, ndikuar dhe nga fakti që për disa shekuj ka qenë dhe qendër peshkopale. Një ndër objektet më të dallueshme në ishull është katedralja e dikurshme e Sardës, e cila është lehtësisht e vizitueshme edhe sot. Sipas të dhënave, qyteti jetonte përmes tregtisë, ndërsa një rëndësi e veçantë i kushtohej edhe bujqësisë duke pasur parasysh që dikur tokat që sot janë nën liqen, kanë qenë shumë pjellore. Një nga figurat më të rëndësishme historike të kohës së Skëndërbeut, Lekë Dukagjini, lidhet me historinë e Sardës, duke qenë se Sarda ka shërbyer dhe si rezidencë e tij.

Vau Dejës, një oaz me shumë të fshehta…

Një tjetër zonë pranë liqenit të Vaut të Dejës që po kthehet në një pikë interesante për t'u vizituar falë bukurive dhe historisë së saj është edhe fshati Mazrek. Rruga për të shkuar deri në fshat është pak e vështirë por banorët e zonës janë rikthyer dhe po punojnë për ta mbajtur hapur dhe për ta bërë të aksesueshme për çdo turist që dëshiron të vizitojë këto vende që janë lënë në harresë, por kanë shumë për të ofruar.

Vau Dejës, një oaz me shumë të fshehta…

Restorantet këtu janë në sintoni me natyrën fantastike përreth liqenit. Ushqimi është tradicional, e ndërkohë pjesa më e madhe e strukturave turistike janë përpjekur të vendosin theksin përherë te natyra.

Vau Dejës, një oaz me shumë të fshehta…

Vau i Dejës po bëhet çdo ditë e më tërheqës, ku numri i turistëve është shtuar shumë vitet e fundit edhe në hapje të këtij sezoni theksi u vendos tek investimet që duhen ndërmarrë për ta kthyer këtë zonë në një atraksion turistik dhe të vizitueshëm në të gjitha stinët e vitit. Nëse kërkoni një natyrë të virgjër, plazhe plotësisht private, por edhe historinë mbase më të vjetër shqiptare dhe plot legjend,a liqeni  i Vaut të Dejës është vendi i duhur që askush nuk duhet ta humbasë. Peizazhet e liqenit artificial, si dhe kodrat e shumta përreth, e bëjnë këtë zonë një atraksion jo vetëm historik e kulturor, por edhe natyror që nuk duhet humbur… në Vaun e Dejës do gjeni thesare të pazbuluara…!/ CNA.al





Lajmet e fundit nga