LEXO PA REKLAMA!

SHKARKO APP

E fundit!

x

Artan Kaja, piktori dibran prej vitesh banues në Pogradec

26 Korrik 2022, 19:47, Qyteti im CNA
Artan Kaja, piktori dibran prej vitesh banues në Pogradec
Artan Kaja duke pikturuar

Artan Kaja është një ndër piktorët e talentuar të qytetit liqenor të Pogradecit të cilin e gjejmë në studion e tij duke hedhur ngjyrat në telajo. Nëse në Korçë gjejmë këngëtarë, serenatistë që i këndojnë aq bukur serenatat, në Pogradec do të njohim piktorë, të cilët pikturojnë me aq mjeshtëri peisazhe të mrekullueshme që fal ky qytet i magjishëm.

Kaja ka përfunduar Akademinë e Arteve në degën e pictures, pasi që fëmijë ka pasur pasion pikturën.  Pas një periudhe prej 8 vitesh, ku stopoi artin e pictures, duket se frymëzimi u rikthye përsëri dhe nuk e la, por e vazhdon këtë pasion që vetëm aristët arrijnë ta kuptojnë.

Artan Kaja, piktori dibran prej vitesh banues në Pogradec

“Gjatë kohës së pandemisë, ku të gjithë duhet të qëndronim në shtëpi, unë rifillova pikturën si më parë. Unë punoj 12 orë çdo ditë, prej orës 7 të mëngjesit, deri në 7 të pasdites. Merrem vetëm me këtë lloj arti. Tashmë, ia kam dedikuar kohën time pikturës. Më pëlqen të pikturoj qeniet humane, por është shumë e vështirë të gjendet një model, janë të trembur, ndonëse unë u ofroj një pagesë për këtë punë”, tregon piktori.

Ndonëse i tërhequr nga piktura, arti vijoi të ishte prezent në jetën e Kajës, i cili vazhdoi traditën familjare të babait të tij, duke punuar në dru veglën muzikore të çiftelisë, kjo pasi origjina e tij është nga Dibra.

“Origjinën e kam nga Dibra, por kemi më tepër se 40 vjet që kemi ardhur në Pogradec. Babai im merrej me çiftelitë dhe unë e pëlqeja këtë zanat të tij të drugdhendjes. Në 8 vjet që stopova pikturën unë bëja çifteli, si një pasion i trashëguar.”

Artan Kaja, piktori dibran prej vitesh banues në Pogradec

Pavarësisht se peisazhi është një muzë mjaft frymëzuese, pasi Pogradeci sipas tij përfaqëson një ndër qytetet më të bukura, piktori Kaja punon edhe teknika të tjera, si ajo me djegie ose e njohur si pirografi. Por portretet janë ato të cilat tërheqin më tepër piktorin pogradecar. Midis fotografisë dhe pikturës si art, Kaja nuk di të vlerësojë njërën dhe të nënvlerësojë tjetrën.

“Në Pogradec ka vend për të pikturuar kudo që të ulesh, me një peizazh mahnitës, që të frymëzon akoma më shumë për ta hedhur në telajo. Është një qytet që nuk mund ta krahasoj më asnjë qytet tjetër. Ndonëse kam udhëtuar në shumë vende, por asnjë nuk ofron këtë që ofron Pogradeci. Fotoja artistike dhe piktura janë mjaft të vështira për tu arritur në perfeksionin e saj. Nëse puna e artistit qëndron në  ngjyrat dhe në detajet që duhet të hedhë në tablo, edhe fotografi profesionist i fotografisë duhet të qëndrojë me orë ose ditë të tëra për të kapur foton e duhur”, shprehet Kaja.

Artan Kaja, piktori dibran prej vitesh banues në Pogradec

Vera është ndër stinët më të bukura në Pogradec, ku edhe turistët janë të shumtë, si brenda dhe jashtë vendit. Turistët mund të marrin edhe një pjesë të Pogradecit me vete kur rikthehen në shtëpi.

Adresa e studios : Rruga Mihal Ballkameni, tek Bulevardi Dëshmorët e Pojskës, Pogradec. Kontakt : 0692695195/ CNA.al

Lajmet e fundit nga