E fundit!

13:22 Politikë

“Forcimi i lekut, sukses i ekonomisë”/ Rama: Deklaratat për 'narkoparatë' nuk lidhen me realitetin

Kryeministri Edi Rama gjatë bashkëbisedimit me përfaqësues...

"Procesi drejt hartave digjitale deri në 2027"/ Rama: 300 mijë legalizime të kryera

2 Prill 2026, 17:01, Politikë CNA

Kryeministri Edi Rama, gjatë fjalës së mbajtur në Asamblenë e Partisë Socialiste në njësinë 14 në Tiranë, u ndal te procesi i legalizimeve. Rama bëri të ditur se deri më tani janë realizuar rreth 300 mijë legalizime në rang vendi, ndërsa procesi vijon për rastet e mbetura.

Ai sqaroi se ka edhe ndërtime që nuk mund të legalizohen për shkak të shkeljeve ligjore, si ndërtimet mbi kolektorë, rrugë apo në zona të papërshtatshme.

Kryeministri foli për vonesat në trajtimin e aplikimeve, ku tha se ka pabarazi mes qytetarëve që kanë aplikuar në vite të ndryshme. Sipas tij, ka raste kur aplikantë që presin prej vitit 2010 nuk kanë marrë ende përgjigje, ndërsa të tjerë me aplikime më të vonshme janë trajtuar më shpejt.

Në këtë kuadër, Rama paralajmëroi ndërtimin e një sistemi të ri me kritere të qarta, të bazuara në vitin e aplikimit, për të garantuar më shumë transparencë dhe drejtësi në procesin e legalizimeve.

Ai theksoi gjithashtu se po punohet për krijimin e hartave digjitale, të cilat do të lehtësojnë ndjeshëm procedurat dhe menaxhimin e të dhënave. Sipas kryeministrit, objektivi është që deri në vitin 2027 i gjithë procesi i legalizimeve të jetë plotësisht i digjitalizuar.

“Janë bërë reth 300 mijë legalizime në total. Ka ende legalizime për t’u bërë. Por janë disa raste që nuk bëhen dot, sepse është ndërtuar ose mbi kolektorë ose mbi rrugë ose probleme të tjera. Ajo që më shqetëson është se përse dikush që pret që më 2010 duhet të presë akoma, kurse ai që ka bërë kërkesën për legalizim më 2018, e merr përpara? Do bëhet një sistem me kritere të qarta me vite. Por puna vazhdon dhe legalizime bëhen përditë. Po bëjmë harta digjitale, që të lehtësojmë procesin. Gjatë 2027, gjithçka do të jetë e digjtalizuar. Sa i përket pensioneve, rritja do të vijojë, sepse mundësitë janë rritur, për shkak se ekonomia është rritur”, tha Rama