web counter
LEXO PA REKLAMA!

SHKARKO APP

App Store
Google Play

E fundit!

x

"Ambasada e SHBA-së nuk bën paralajmërime pa bazë"/ Berisha: Kryengritja e opozitës do të vijojë

2 Prill 2026, 12:57, Politikë CNA

"Ambasada e SHBA-së nuk bën paralajmërime pa

Në ceremoninë e 35-vjetorit të ngjarjeve të 2 Prillit në Shkodër, kreu i PD-së, Sali Berisha, ka akuzuar kryeministrin Edi Rama se po bllokon integrimin europian.

“Edi Rama, për vjedhjet e tij, i bllokon Shqipërisë dyert e Europës dhe i tregon derën e Beogradit. Premtoi pasaportën europiane dhe tani ofron pasaportën e Beogradit. Tani kërkon, për të mbajtur pushtetin dhe karrigen, të mos bëhemi anëtarë të BE-së, por të kemi tregti dhe lëvizje të lirë. Edi Rama është i vetmi kryeministër në Europë që guxon të hartojë ligje mburojë për vjedhjet e tij. Miq, beteja kundër hajdutëve të pushtetit është sot beteja më e shenjtë e shqiptarëve”, u shpreh Berisha.

Ndër të tjera, ai foli edhe lidhur me protestat e opozitës ku tha se do të vijojnë deri në realizimin e qëllimeve.

“Kryengritja paqësore nuk është një ndeshje futbolli që mbaron brenda një afati, të gjithë do të donim të ishte e tillë, por që në momentin që thuhet kryengritje paqësore, vetëkuptohet që ajo është një lëvizje e qëndrueshme dhe vazhdon gjer në realizimin e qëllimeve”, u shpreh ai.

Lidhur me paralajmërimin e ambasadës amerikane për sulme të mundshme iraniane, Berisha tha se ai njoftim nuk ishte pa bazë, ndërsa shtoi se NATO duhet të përforcojë mbrojtjen e Shqipërisë.

“Nuk lëshohet një paralajmërim pa një bazë. Kjo është e sigurt. A ka Shqipëria mbrojtje nga NATO? Po, çdo vend i NATO-s, hapësira ajrore e Shqipërisë është hapësirë e NATO-s dhe të sigurt jemi se NATO do të na mbrojë. Kjo nuk do thotë se NATO do të na mbrojë në tokë, këtu duhet të jenë shqiptarët vetë që të kenë vëmendje. Ata e kanë lëshuar për qytetarët amerikanë dhe kompanitë amerikane që operojnë, por nuk ka asnjë të keqe, secili të ketë parasysh të vazhdojë jetën normale dhe t’i bëjmë thirrje NATO-s të përforcojë mbrojtjen e hapësirës ajrore të Shqipërisë”, tha Berisha.

Kryedemokrati u pyet nga gazetarët për përjashtimet nga anëtarësia e Partisë Demokratike. Ai tha se është tradhti çdo bashkëpunim me partinë në qeverisje.

“Demokratët nuk mund të jepen me qira, nuk mund t’i shërbejnë partisë së krimit. Dhe absolutisht është tradhti çdo tolerancë e bashkëpunimit të fshehtë apo të hapur me pushtetin e krimit”, u shpreh ai. /CNA





Lajmet e fundit nga