Rreziku nga Irani/ Mediu: Presidenti duhet të thërrasë urgjentisht Këshillin e Sigurisë Kombëtare

1 Prill 2026, 21:59, Politikë CNA

Rreziku nga Irani/ Mediu: Presidenti duhet të thërrasë

Kreu i Partisë Republikane, Fatmir Mediu, ka reaguar pas paralajmërimit të ambasadës së SHBA-së, e cila njoftoi se grupe të lidhura me Iranin mund të shënjestrojnë subjekte të lidhura me Shtetet e Bashkuara ose elementë të rezistencës iraniane në Shqipëri.

Mediu thekson se Shqipëria, si partner i SHBA-së dhe vend me prezencën më të madhe të organizuar të rezistencës iraniane, përballet me një rrezik real për sulme, përfshirë jo vetëm raketa dhe dronë, por edhe veprime subversive dhe sulme ndaj infrastrukturës kritike.

Ai shkruan se kërcënimi nuk mund të injorohet, pavarësisht anëtarësimit të Shqipërisë në NATO.

Kreu i Partisë Republikane i bën thirrje presidentit të Republikës të thërrasë urgjentisht Këshillin e Sigurisë Kombëtare, i cili sipas tij është zhvlerësuar dhe i inekzistent prej kohësh.

Mediu kërkon që shërbimet inteligjente të marrin masat e duhura për të mbrojtur qytetarët dhe interesat jetike të vendit, duke bashkëpunuar me partnerët ndërkombëtarë.

Postimi i Mediut

Ambasada e SHBA-së ka publikuar sot, në mbrëmje vonë, një alarm sigurie, ku u bën thirrje shtetasve amerikanë të kenë kujdes, pasi grupe të lidhura me Iranin mund të shënjestrojnë subjekte të lidhura me Shtetet e Bashkuara ose elementë të rezistencës iraniane në Shqipëri.

Prej vitesh, Shqipëria ka shkëputur marrëdhëniet diplomatike me Iranin, është partnere me SHBA-në dhe ka sot prezencën më të madhe të organizuar të rezistencës iraniane.

Me propozimin e Ramës, Garda iraniane u shpall organizatë terroriste. Po ashtu, sulmet kibernetike janë rritur, duke goditur institucione të rëndësishme. Çfarë presim të ndodhë?

Përballë kësaj situate, Presidenti i Republikës duhet të thërrasë urgjentisht Këshillin e Sigurisë Kombëtare, i cili është zhvlerësuar dhe është inekzistent prej kohësh.

Bëni punën tuaj që ju ka caktuar Kushtetuta dhe ligji dhe për të cilën paguheni.

Këshilli i Sigurisë Kombëtare të bëjë analizën e situatës, në bashkëpunim me partnerët. Shërbimet inteligjente të marrin masat që duhen urgjentisht për t’u organizuar dhe për t’u mbrojtur nga çdo sulm, i cili mund të mos jetë thjesht me raketa dhe dronë, siç mendojnë dhe flasin shumë, por edhe me veprime subversive të organizuara nga Irani, sulme në infrastrukturë kritike dhe interesa jetike të qytetarëve etj.

Shteti nuk është pushteti i Kryeministrit dhe i Qeverisë, por janë të gjitha institucionet që kanë primar interesin e ruajtjes së sigurisë kombëtare dhe sigurisë së qytetarëve, të cilës duhet t’i shërbejë politika dhe institucionet.

Boll me deklarime sa naive dhe idioteske se “ne nuk kemi probleme sepse na mbron NATO”. Anëtarësimi në NATO nuk do të thotë të heqësh dorë nga mbrojtja e sigurisë kombëtare dhe të mos vlerësosh kërcënimet.