E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Për “burrin” që na ka mbetur në derë!

8 Qershor 2022, 13:01, Politikë Rudina Hajdari

Po dëgjoja Kryeministrin sot, teksa fliste në eventin e organizuar për nismën “Ballkani i Hapur” duke argumentuar se kjo nismë do të ndihmojë së pari fermerët shqiptarë.

Jam e bindur se fermeri shqiptar e di shumë mirë se kjo është një propagandë e shëmtuar dhe se realiteti flet krejt ndryshe, ata po e heqin në lëkurë politikën e mbrapshtë të qeverisë, por dua të ndaj sot disa shifra edhe për pjesën tjetër të publikut për të argumentuar se pse e gjithë kjo që po propagandandon Edi Rama është një gënjeshtër e madhe.

"Ballkani i Hapur" ka në përbërjen e vetë sot 3 shtete, Shqipëria, Maqedonia e Veriut dhe Serbia. Maqedonia e Veriut konkurron fort në Shqipëri, ndër të tjera, me produktet e saj bujqësore. Si pasojë e kësaj konkurrence, e cila vjen kryesisht prej faktit se ata kanë politika shumë të mira subvencionuese dhe stimuluese për fermerët e tyre e për rrjedhojë çmimet e produkteve dalin me kosto më të lirë, sipërfaqja bujqësore në Shqipëri nga viti 2005 e deri në vitin 2020 sipas INSTAT është rritur me vetëm 20 ha. Pra, në 15 vite, 9 prej të cilave zoti Rama është kryeministër, fermerët kanë shtuar vetëm 20 ha sipërfaqe të mbjellë, edhe kjo (po sipas INSTAT) është kryesisht sipërfaqe e mbjellë me misër.

Serbia nga krahu tjetër, një nga produktet që konkurron fort fermerin shqiptar është qumështi. Prodhimi i qumështit (sipas INSTAT) ka rënë që pas nënshkrimit të marrveshjes së "Open Balkan" me rreth 20 mijë ton në Shqipëri. Nëse flet me prodhuesit dhe u hedh një sy edhe statistikave të doganës do të kuptosh se qumështi shqiptar është zëvendësuar me atë serb, duke i shkaktuar humbje, por edhe mungesë interesi fermerit shqiptar, për shkak se Serbia ka një politikë të fortë subvencionuese për blegtorinë.

Për “burrin” që na ka mbetur në derë!

Një Kryeministër, i cili ka si mision t'i shërbejë vendit të vetë, para se të lejojë tregjet e huaja të konkurrojnë më lirshëm në Shqipëri, sigurohet se tregu vendas përfiton nga këto lehtësi.

Një Kryeministër, i cili u shërben shqiptarëve, së pari do të miratonte politika agresive mbështetëse dhe subvencionuese për fermerin shqiptar e kur të sigurohej se ai është mjaftueshëm i fuqishëm do të kërkonte marrëveshje jashtë, jo për ta dëmtuar, por për ta ndihmuar.

Ajo që Rama po bën me "Open Balkan" është pikërisht e kundërta. Ai po i siguron një ambient edhe më të favorshëm fermerëve të Serbisë dhe Maqedonisë së Veriut për të konkurruar edhe me bindshëm fermerin shqiptar. Pa harruar këtu faktin që duke u dhënë atyre aksesin në Adriatik, pa tarifa e kosto, do t'ua lehtësojë edhe më shumë barrën fermerëve të Serbisë dhe Maqedonisë së Veriut duke u ulur kostot e lëndës së parë.

Ndaj, nuk ka asnjë habi se përse "Open Balkan" merr mbështetje kaq të madhe nga Ministri i Jashtëm Rus, Lavrov, dhe sigurisht Presidenti i Serbisë Vuçiç. Në thelb kjo nismë i shërben fuqizimit të mëtejshëm ekonomik të Serbisë dhe dobësimit të shqiptarëve, si atyre në Shqipëri dhe atyre në Kosovë. Ballkani hapet për Serbinë dhe Rusinë dhe mbyllet për shqiptarët.

E duke qenë se sot e krahasoi Ballkanin me një burrë që ka ngelë në derë se nuk e merr njeri, unë besoj se i vetmi “burrë” që u ka ngelë në derë shqiptarëve është ai.

Një kryeministër që i shërben kujtdo përveç shqiptarëve, ndaj sa më shpejt ta “martojmë” aq më mirë për të gjithë ne.