Peleshi reagon për Rezolutën e Integrimit: Konsensusi mes mazhorancës dhe opozitës nuk është dobësi

15 Maj 2026, 15:46, Politikë CNA

Peleshi reagon për Rezolutën e Integrimit: Konsensusi mes

Kryetari i Kuvendit të Shqipërisë, Niko Peleshi, ka reaguar pak minuta më parë lidhur me miratimin e Rezolutës së Integrimit gjatë seancës së të enjtes.

Përmes një postimi në rrjetet sociale, Peleshi duket sikur ka dashur të sqarojë edhe zërat për një konsensus mes mazhorancës dhe opozitës, për këtë zhvillim që lidhet ngushtësisht me integrimin europian të vendit.

Peleshi shprehet se konsensusi mes së majtës dhe së djathtës nuk është dobësi, por një ngjarje pozitive dhe shumë e rëndësishme në këtë moment të procesit që ndodhet Shqipëria.

Sipas kryeparlamentarit, konsensusi për një çështje të tillë të madhe kombëtare, që shkon përtej përfitimeve afatshkurtra politike, nuk dobëson askënd, përkundrazi forcon si mazhorancën, ashtu edhe opozitën.

“Konsensusi ndërmjet forcave të mazhorancës dhe opozitës mbi Rezolutën për anëtarësimin në BE ishte një ngjarje pozitive dhe shumë e rëndësishme për momentin ku ndodhet vendi ynë.

Shqipëria ka një karakteristikë unike ndër vendet aspirante, madje edhe ndër vendet anëtare të BE-së: të gjitha partitë politike, në mazhorancë apo opozitë, parlamentare apo joparlamentare, të mëdha apo të vogla, kanë në program si prioritet absolut anëtarësimin në BE. Pra, në Shqipëri nuk ka forca politike (apo shoqërore) euroskeptike.

Miratimi konsensual i rezolutës ishte rasti për ta mbështetur jo vetëm me fjalë, por edhe me vepra, njëzëri, aspiratën tonë të përbashkët për anëtarësim.

Nga ana tjetër, ky konsensus duhet të mbështetet edhe nga opinioni mediatik, i cili, duam apo nuk duam, modelon opinionin e gjerë publik.

Në diskursin publik ekziston një frymë kritike ndaj polarizimit politik, me të drejtë, por është e padrejtë të analizohet “kush humbi” kur arrihet (fatkeqësisht jo aq shpesh) një konsensus.

Konsensusi për çështjet e mëdha kombëtare, që shkojnë përtej përfitimeve afatshkurtra politike, nuk dobëson askënd; përkundrazi, forcon si mazhorancën, ashtu edhe opozitën.

Mbi të gjitha, forcon Shqipërinë tonë",-shkruan Peleshi./CNA