web counter
LEXO PA REKLAMA!

SHKARKO APP

App Store
Google Play

Bujqësia në krizë dhe fondet e pezulluara/ Qeveria kërkon shpëtim te bankat për dështimin me grantet e BE-së

15 Maj 2026, 12:59, Politikë CNA

Sektori i Bujqësisë, dikur i cilësuar si motori i ekonomisë rurale, sot po përballet me një nga periudhat më kritike, duke u kthyer në nyje kyçe të procesit të integrimit të Shqipërisë në Bashkimin Europian.

Ndërkohë që fermerët janë derdhur në rrugë në protesta të vazhdueshme për mungesën e mbështetjes, heqjen e subvencioneve dhe rritjen e kostove të naftës, qeveria duket se po tenton të transferojë përgjegjësinë e financimit te sektori bankar.

Gjatë nënshkrimit të marrëveshjes për programin “Dyfisho Sipërmarrjen Tënde”, kryeministri Edi Rama ka kërkuar nga bankat private që të tregohen më "kurajoze" në kreditimin e bujqësisë, një sektor që mbetet i lënë pas dore nga politikat fiskale dhe i goditur nga pezullimi i fondeve të BE-së pas dyshimeve për korrupsion.

Në këtë aktivitet, ishin fjalët e kryeministrit dhe Guvernatorit të Bankës së Shqipërisë, Gent Sejko, ato që dëshmuan përpjekjen për të gjetur burime alternative financimi për një sektor që po lëngon.

Në të njëjtën linjë si Rama, Guvernatori Gent Sejko ka kërkuar nga industria bankare që të kthejë sytë nga ndërmarrjet e vogla dhe të mesme, veçanërisht ato në zonat rurale, duke e parë këtë si një domosdoshmëri për qëndrueshmërinë e vendit.

Opozita ka akuzuar ashpër kabinetin qeveritar, duke pretenduar se keqmenaxhimi dhe abuzimet kanë çuar në humbjen e miliona eurove nga programet e Bashkimit Europian. Sipas ish-kryeministrit Sali Berisha, bëhet fjalë për një dëm prej 134 milionë eurosh që ishin destinuar për fermerët, por që janë avulluar përmes skemave korruptive, duke e lënë fshatin pa mbrojtje financiare.

Përtej thirrjeve për "kurajë" bankare, realiteti në terren mbetet i zymtë. Pa një strategji të qartë mbështetjeje direkte dhe me hijen e vjedhjes së fondeve të BE-së, bujqësia shqiptare rrezikon të mbetet sektori më i pambrojtur dhe një pengesë serioze në rrugëtimin europian të vendit./ CNA





Lajmet e fundit nga