web counter
LEXO PA REKLAMA!

SHKARKO APP

App Store
Google Play

Propaganda me turizmin/ Institucionet në "gatishmëri" apo thjesht premtime në letër?

15 Maj 2026, 12:21, Politikë CNA

Në një kohë kur sezoni turistik ka nisur me problematika të mbartura, zëvendëskryeministrja Albana Koçiu dy ditë më parë vizitoi Portin e Sarandës për të servirur premtimet e radhës qeveritare.

Përmes një gjuhe që synon të fshehë dështimet e menaxhimit në terren, Koçiu e prezantoi Shqipërinë si "shembull të Europës" për mungesën e radhëve, ndërkohë që realiteti i pikave kufitare flet për të kundërtën.

Koçiu u përpoq të krahasonte situatën në Shqipëri me sistemet e BE-së, duke pretenduar se vendi ynë po menaxhon fluksin më mirë se vendet anëtare, një deklaratë që ngjan më shumë me propagandë elektorale sesa me një analizë të mirëfilltë të situatës në kufi.

Plani i masave i prezantuar nga zëvendëskryeministrja përfshin listën e zakonshme të premtimeve, shtim sportelesh, patrullime në det dhe gatishmëri të zjarrfikësve.

Megjithatë, përtej deklaratave për "qendra shëndetësore verore" dhe "evente kulturore", qeveria nuk adreson problemet reale që shqetësojnë bizneset e jugut, si rritja e pakontrolluar e çmimeve, mungesa e fuqisë punëtore dhe pasiguria në plazhe nga mjetet lundruese, të cilat çdo vit shkaktojnë tragjedi.

Në vend që të analizonte sfidat reale të një sektori që po rritet në mënyrë organike pa ndihmën e duhur shtetërore, zëvendëskryeministrja u mjaftua me retorikën e "suksesit të garantuar"./ CNA





Lajmet e fundit nga