“Kërcimi i Tigrit” dhe mosprezenca në Kuvend/ Rama mes shkëlqimit jashtë dhe akuzave brenda vendit

15 Maj 2026, 13:06, Politikë CNA

“Kërcimi i Tigrit” dhe mosprezenca në Kuvend/ Rama mes

Edi Rama, një kryeministër në dy plane të ndryshme, protagonist në ekranet e Europës me mesazhe për integrimin dhe Inteligjencën Artificiale, po i shmanget sallës së Kuvendit kur flitet për të njëjtat çështje.

Kryeministri Edi Rama ndodhej këtë të premte në Talin të Estonisë, për të marrë pjesë në Konferencën Lennart Meri 2026, një nga forumet më të rëndësishme të sigurisë gjeopolitike.

Nën moton “Fati i favorizon të guximshmit”, kreu i qeverisë mbajti një deklaratë të përbashkët me homologun estonez, Kristen Michal, ku shpalli ambicien që rrugëtimi i Shqipërisë drejt vitit 2030 të udhëhiqet nga risitë teknologjike.

Në fjalën e tij, Rama kërkoi asistencën e Talinit zyrtar për atë që e quajti "kërcimi i Tigrit", duke synuar aplikimin e modelit estonez në sistemin arsimor dhe teknologji.

Nga vendi balltik kryeministri nuk i kurseu as batutat diplomatike dhe ironitë gjeopolitike, duke ftuar investitorët dhe turistët estonezë të braktisin errësirën dhe të zgjedhin Shqipërinë, duke garantuar se në Shqipëri do të ndihen si në shtëpi, pasi nuk ka asnjë simpati për presidentin rus Vladimir Putin.

Por teksa shefi i qeverisë pozicionohet krah liderëve euroatlantikë për të diskutuar mbi forcimin e NATO-s dhe rolin e Ukrainës, kjo sfilatë diplomatike ka lënë një shije të hidhur në Tiranë. Vetëm një ditë më parë, salla e Parlamentit u përfshi nga tensionet e ashpra pikërisht për shkak të mungesës së tij.

Në rend dite ishte diskutimi i projektrezolutës për integrimin e Shqipërisë në Bashkimin Europian, por ndërsa deputetët prisnin ballafaqimin me kreun e qeverisë, Rama u shfaq në rrjetet sociale nga Gjermania, ku mori pjesë në ceremoninë e çmimit "Charlemagne Prize" krah Mario Draghit.

Mungesa e kryeministrit u cilësua nga opozita si një një akt i pastër papërgjegjshmërie në raport me llogaridhënien.

Kjo agjendë mund të dëshmojë edhe prioritetet e kreut të qeverisë, dje në Gjermani, sot në Estoni, por rrallë e më rrallë në Kuvendin e Shqipërisë për t'u përballur me realitetin e vendit që drejton./ CNA