“Ftesa e Ramës për estonezët, hipokrizi”/ Këlliçi: Në Shqipëri bën biznes vetëm ortaku i kryeministrit

15 Maj 2026, 14:56, Politikë CNA

“Ftesa e Ramës për estonezët, hipokrizi”/

Deputeti i Partisë Demokratike, Belind Këlliçi, ka reaguar me tone të ashpra ndaj ftesës që Kryeministri Edi Rama u bëri sipërmarrësve estonezë për të investuar në Shqipëri, duke e cilësuar atë si një "parullë propagandistike" dhe hipokrizi të pastër.

Përmes një deklarate në rrjetet sociale, Këlliçi u shpreh se realiteti me të cilin përballen investitorët e huaj në Shqipëri është tërësisht ndryshe nga ai që prezantohet në samite apo takime zyrtare.

Sipas tij, mungesa e investitorëve të mëdhenj nga Gjermania, Italia apo Shtetet e Bashkuara të Amerikës vjen si pasojë e drejtpërdrejtë e faktit se për të bërë biznes në vend, kusht i paracaktuar është të jesh ortak apo klient i Edi Ramës.

Këlliçi hodhi akuza të forta për ndarjen e pasurive publike dhe tenderëve strategjikë në tavolina private, jashtë çdo gare të ndershme.

Ai denoncoi raste specifike si kalimi falas i truallit më të shtrenjtë në vend për projektin Alabar, dhënien e 50 milionë eurove për një kompani turke pa kryer asnjë punë, si dhe projektin 120 milionë euro për teknologjinë smart-city që sipas tij po i jepet pa garë një kompanie kineze.

Këlliçi përmendi gjithashtu emra të përfolur në afera të mëparshme, si McGonigal, zyrtarë të Guardia di Finanza dhe eksponentë të tjerë, për të ilustruar se si funksionon, sipas tij, rrethi i ngushtë i përfituesve në Shqipëri.

“Duhet të jesh si Roni i armëve që të kesh sukses. Me status si Alabari që merr falas truallin më të shtrenjtë. Bën hajër po të jesh si McGonigal. Bëhesh pronar po të jesh ai gjenerali i Guardia di Financa që raporton se s’ka drogë. Vetëm nëse kalon në tarafin e Ramës dhe mbështet interesat e tij, të hapen rrugët”, tha Këlliçi.

Në mbyllje të reagimit të tij, Këlliçi nënvizoi se dosjet më të rënda të abuzimit me pushtetin në Shqipëri janë zbuluar tashmë nga partnerët ndërkombëtarë. Ai ironizoi përpjekjet e kreut të qeverisë, duke shtuar se pavarësisht shpresave të Ramës, imazhi i korrupsionit të ekzekutivit shqiptar ka mbërritur tashmë edhe në Estoninë e largët.

“Hipokrizia me ftesën për të ardhur në Shqipëri!

Paska ftuar Edi Rama sot Estonezët të vijnë në Shqipëri se do të ndihen mirë! Sigurisht kjo është një parullë në rastin e kryeministrit tonë. Realiteti flet ndryshe.

Është kjo arsyeja pse jo vetëm estonezët, por dhe investitorët gjermanë, italianë, amerikanë mungojnë sot. Sepse që të bësh biznes këtu, duhet të jesh ortak dhe klient i Edi Ramës.

Duhet të jesh si Roni i armëve që të kesh sukses. Me status si Alabari që merr falas truallin më të shtrenjtë. Bën hajër po të jesh si McGonigal. Bëhesh pronar po të jesh ai gjenerali i Guardia di Financa që raporton se s’ka drogë. Vetëm nëse kalon në tarafin e Ramës dhe mbështet interesat e tij, të hapen rrugët.

Duhet të kesh fatin e asaj kompanisë turke që mori 50 milionë euro pa bërë asgjë. Apo si miku kinez i kreut të organizatës që po merr 120 milionë euro për smart-city. Pa garë. Afera që zgjidhen me bosin në tavolinë.

Në një vend ku çdo gjë është e paracaktuar, ku tenderat, prokurimet, koncesionet, liçensat i kapin një grusht njerëzish, klubi i ngushtë i kryeministrit dhe familjes së tij, çdo ftesë që u bëhet të huajve për të ardhur këtu, është thjeshtë hipokrizi.

Ajo që thuhet në publik është propagandë. Ashtu si funksionon në praktikë, sipërmarrësit duhet ta zgjidhin në rrugë private.

Kjo e vërtetë e vendit të vogël po me korrupsion të madh, për fat të keq është marrë vesh.

Shumë prej dosjeve më të rënda të abuzimit kanë ardhur nga partnerët. Ndoshta Edi Rama shpreson se bëmat e tij nuk kanë mbërritur deri në Estoninë e largët.

Por gjasat janë që edhe atje Shqipëria është bërë e njohur nga aferat e Kryeministrit më të korruptuar në Europë”, shkruan Këlliçi./ CNA