Menaxhimi i mbetjeve/ Malltezi: Projektligji i qeverisë ka të dhëna kondradiktore

7 Tetor 2025, 16:13, Politikë CNA

Menaxhimi i mbetjeve/ Malltezi: Projektligji i qeverisë ka të

Drejtuesi i Departamentit të Mjedisit në PD, Jamarbër Malltezi ka zhvilluar sot një dëgjesë publike për projektligjin e përgatitur nga qeveria për trajtimin e mbetjeve. Malltezi është shprehur se projektligji përmban të dhëna kontradiktore ndërsa rrezikon të rrisë edhe çmimet për qytetarët.

Sipas tij, kostoja e trajtimit të mbetjeve është një kosto që nuk e kanë as vendet më të zhvilluara të botës. Ai tha se projektligji për menaxhimin e mbetjeve ka të dhëna të sakta por edhe të papranueshme.

"Ka të dhëna kontradiktore. Biles edhe për çmimet për qytetarët që mund të shkojnë deri ne 6- fishimin e tarifave të tanishme. Relacioni shoqërues i ligjit që është vlerësimi i ndikimit të projekt ligjit thotë që, kostoja e trajtimit të mbetjeve do të jetë nga 70 euro deri në 170 euro për tonë mbetjesh.

Kjo është një kosto që zor se mund të kenë edhe vendet më të zhvilluara të botës. Pra edhe për produktet bujqësore që janë mall me vlerë nuk e kanë një kosto të tillë. Këtu kostoja e trajtimit të mbetjeve, pra është jashtëzakonisht e lartë. Kemi parasysh që kostoja e trajtimit të mbetjeve para 15 vitesh ishte vetëm 12 euro. Pra pagesa për qytetarët ishte vetëm 12 Euro për ton, më pas shkoi 29 euro për ton dhe mendohet që mund ta çojnë nga 70 deri ne 170 euro për ton. Pra mund të kemi 5 ose 6 - fishim të kostove.

Dëgjesat publike për këtë projektligj, qeveria pretendon që i ka kryer nga datat 16 nëntor deri me datën 24 nëntor 2024. Pra është një faturë miliona euro që impakton familje, që impakton biznese ricikluese, impakton bashkitë. Çdo bashki do të duhet të nxjerrë para dhe kanë pasur vetëm 7 ditë dëgjesë publike. Me çfarë kam parë në relacion, janë rreth 21 persona e gjitha që kanë paraqitur komente.

Atëherë ka paqartësi se cilët ekspertë kanë punuar për këtë, sa seriozë janë këta ekspertë që mund ta kenë bërë. Ka një kakofoni. Ka edhe disa të dhëna të sakta, ka edhe disa të dhëna tërësisht të papranueshme. Ka paqartësi mes tagrave ligjore që ka pushteti vendor dhe ngritjes së Agjencisë së qendrore që do të menaxhojë mbetjet.

Kthehemi tek ligji. Neni 22 ka të bëjë me Agjencinë Kombëtare të mbetjeve. Siç ju thashë, pika 5b e saj vijon....Zhvillon, koordinon, administron infrastrukturën kombëtare të impianteve të trajtimit rikuperimit dhe të asgjësimit të mbetjeve....realizon projekte për ngritjen e infrastrukturës fundore të menaxhimit të mbetjeve...", tha Malltezi ndër të tjera./CNA