"Ekspresi i mirë s'është justifikim për të zaptuar trotuaret"/ Rama: Po marrim mbrapsht hapësirat

7 Tetor 2025, 14:12, Politikë CNA

"Ekspresi i mirë s'është justifikim për të

Kryeministri Edi Rama mori pjesë në edicionin e 25-të të konferencës ndërkombëtare “Walk 21”.

Rama bëri një krahasim të qytetit të Tiranës në dy kohë, ne periudhën e komunizmit dhe pas viteve ’90.

Kryeministri trajtoi problematikën e hapësirave publike dhe tha se pas rënies së diktaturës mijëra metra katrorë gjelbërim u zunë me ndërtime të paligjshme dhe se çdo hapësirë publike u pa si hapësirë për t’u zënë.

Rama tha se ecja ishte mënyra më e mirë për t'u lidhur me të tjerët dhe sot është sfidë.

"Sot ndërkohë kemi një sfidë të madhe sepse ajo çfarë morëm si rezultat i pak a shumë 50 viteve jetese në atë hapësirë të madhe ku ecja ishte mënyra e parë e më e besueshme për t'u lidhur me të tjerët, ku biçikletat ishin mënyra e dytë më e mirë për t'u lidhur me të tjerët, ku transporti publik ishte mënyra e tretë dhe e fundit.

Pas rënies së atij sistemi, njerëzit e panë hapësirën publike si hapësirë për t'u zënë, hapësirë për t'u privatizuar. Në gjithë atë periudhë dëshirash individuale të shtypura, të cilat lulëzuan dhe dolën në sipërfaqe duke zënë të gjitha hapësirat publike, duke ndërtuar në mënyrë të paligjshme kudo ku ishte e mundur dhe duke eliminuar praktikisht çdo hapësirë të gjelbër që shihni sot.

Pikërisht kështu, përveç liqenit që ishte, që vazhdonte të ishte dhe përveç shumicës së pemëve që ishin aty, ajo çfarë shohim sot nuk ishte më. Çdo metër katror gjelbërim u mbulua e u varros nën mijëra e mijëra ndërtesa të paligjshme. Lumi që kalon përmes qytetit nuk ishte më i dukshëm sepse të dyja anët e lumit ishin të zëna me vija kaq të gjata ndërtesash dhe 90 % fjalë për fjalë, jo metaforikisht, 90% e pemëve që shihni sot në rrugët e qytetit nuk ishin.

Kur u bëra kryetar bashkie në vitin 2000 na u desh të merrnim mbrapsht qytetin tonë, duke shembur më shumë se 10 mijë ndërtesa. Vetëm nga lumi hoqëm 132 mijë tonë beton që ishin rrënoja nga shembjet. Gjatë atyre viteve mbollëm 55 mijë pemë, që sot janë të kudogjendura", deklaroi kryeministri.

Rama tha se tani po marrin mbrapsht hapësirat publike. Ai me shaka tha se vërtet Shqipëria ka ekspresin më të mirë, por ky nuk është justifkim për të zaptuar trotuaret.

"Megjithatë, edhe pse bëmë shumë për t'u risjellë njerëzve hapësirë ku ata të shijonin të ecurin, ecja nëpër qytet u bë gjithmonë e më e vështirë. Mendoj që 5.09 çdo minutë që mund të marrim për të ngadalësuar hapin, në çdo metër që do mund të përfitojmë për këmbësorët është një sukses për t'u festuar sepse është një mënyrë për të ndihmuar njerëzit tanë, por për aq kohë sa jemi ende të vetëdijshëm për sfidat e për atë që duhet të bëjmë, atëherë na duhet të luftojmë. Kjo është arsyeja pse kemi çelur së fundmi një kapitull për ta luftuar këtë gjë. Nuk e kemi më problemin e ndërtimeve të paligjshme, të cilat lidhen me betonin apo me katet apo hapësirat publike në qytet, por na duhet që të luftojmë ditë për ditë, edhe ndërkohë që flasim, për të hequr të ashtuquajturat struktura të përkohshme, të cilat në fakt kanë zënë trotuaret, hapësirat publike, për të vendosur tavolina pa fund, karrige, për të ofruar ekspres pas ekspresi. E di që kemi ekspresin më të mirë jashtë Romës, por nuk është një justifikim plotësisht i mirë për të vazhduar dhe për të zënë e pushtuar hapësira publike thjesht për të ofruar ekspres.

Kështu që çdo ditë po marrim mbrapsht hapësirat dhe duam që të shtojmë edhe më shumë pemë dhe gjelbërim në qytet për të cilat tashmë kemi një rregullore të re që gjithkush që merr një leje ndërtimi duhet të kontribuojë në fondin e gjelbër me një numër të caktuar pemësh përmes një formule e cila e përllogarit në bazë të metrave katrorë që ai ose ajo do të ndërtojë", tha Rama./CNA