"Vrasja ndodhi edhe për shkak të hartës gjyqësore"/ Bardhi: Rama po nxit vetëgjyqësinë

7 Tetor 2025, 11:14, Politikë CNA

"Vrasja ndodhi edhe për shkak të hartës

Kryetari i Grupit Parlamentar të Partisë Demokratike, Gazment Bardhi, ka analizuar ngjarjen që tronditi dje Shqipërinë ku u vra brenda sallës së gjyqit gjyqtari Astrit Kalaja.

Bardhi tha se kjo vjen për shkak të hartës së re gjyqësore, e cila ka sjellë vonesa në shqyrtimin e çështjeve nga 6 muaj në 2 vite.

Gazment Bardhi deklaroi se kjo cenon të drejtat e njeriut pasi një gjyqtar i pasigurt nuk mund të japë drejtësi.

"Harta gjyqësore ka sjellë 6 muaj vonesë për të shqyrtuar një çështje, kjo është mesatarja sepse ka çështje ku kanë kaluar edhe 2 vite. E gjithë ajo që ndodhi edhe në Gjykatën e Apelit është nga kjo. Dje vërtet ka ndodhur një ngjarje e rëndë, por më të rënda janë reagimet e Ministrisë së Brendshme që thoshte se institucioni nuk ka lidhje.

Kjo ka të bëjë me të drejtat e njeriut prandaj po e shpjegoj më gjatë sepse pastaj bëheni injorantë të ligjit.

Një gjyqtar që ndihet i pasigurt në sallën e gjyqit është i pamundur të japë drejtësi, ndaj është e rëndësishme për aksesin në drejtësi që gjyqtari të ndihet i sigurt", tha Bardhi.

Bardhi komentoi deklaratën e ministres së Brendshme Albana Koçiu dhe tha se janë hequr policët nga godinat me VKM dhe tani njerëz të armatosur futen në gjykata.

Deputeti tha se Rama po nxit vetëgjyqësinë.

Bardhi tha se një tjetër arsye pse ndodhi kjo vrasje është edhe gjuha e kryeministrit Edi Rama ndaj gjyqtarëve dhe prokurorëve pasi humbet çështjet ku shteti është palë, të cilat zënë vetëm 5% pasi 95% fiton shteti përballë qytetarëve.

"Është Këshilli i Ministrave që përcakton rregullat e aksesit në gjykata, policët nuk i kemi për të mbrojtur gjyqtarët. Qeveria hoqi policët nga godinat dhe kjo bëri që të hyjnë individë me armë në brez dhe gjyqtarët të jenë të pasigurt në sallën e gjyqit.

Nuk mund të thotë ministri që vumë menjëherë në pranga autorin sepse ai priti jashjtë sallës e teksa ai thoshte jam unë policët hynin në gjyq.

Nuk është rastësore që qytetarët të bëjnë vetëgjyqësi, kemi parë kryeministrin që bën vetëgjyqësi për çështjet në të cilat është palë dhe i quan gjyqtarët bastardë.

Kjo nuk ka ndodhur, as në Itali, mafia nuk ka guxuar t’i vrasë në sallën e gjyqit.

Në jemi deputetë dhe mund të bëjmë komente, por kur shohin ministrat dhe kryeministrin, atëherë nxiten për vetëgjyqësi.

Kur vriten gjyqtarët reagon KLGJ, ndërsa kur vriten me fjalë nga kryeministri hesht.

95% të çështjeve i fiton shteti, në 5% kur gjyqtarët guxojnë 'vriten' nga kryeministri", deklaroi ai./CNA