Leonard Rakipaj, në garë për bashkinë Selenicë/ Berisha, i bindur për fitore

21 Mars 2023, 17:51, Politikë CNA

Leonard Rakipaj, në garë për bashkinë Selenicë/

Kryetari i Partisë Demokratike, Sali Berisha

Kryetari i Partisë Demokratike, Sali Berisha ka mbajtur sot një takim me qytetarët e Selenicës, ku prezantoi kandidatin për këtë bashki në zgjedhjet vendore të 14 majit, Leonard Rakipajn.

Gjatë fjalës së tij, Berisha e cilësoi Rakipajn si kryetarin e ardhshëm të Bashkisë Selenicë, duke shprehur bindje për fitoren e opozitës.

Pjesë nga fjala:

Të dashur banorë të Peshkëpisë, Selenicës, fshatrave përreth. I dashur deputet i Vlorës, miku im, Bujar Leskaj. I dashur kryetari i PD-së për Selenicën, Guri Leskaj. I dashur kandidati për qytetar të parë të Bashkisë së Selenicës, dhe me mbështetjen tuaj kryetari i ardhshëm i Bashkisë Selenicë, Leonard Rakipaj.

Së pari, u përshëndes ju përzemërsisht dhe u falënderoj për pjesëmarrjen në këtë takim, por unë përshëndes nga kjo platformë të gjithë banorët e Selenicës, banorët e fshatrave përreth, banorët e Vlorës kudo që janë sot.

Shpreh kënaqësinë që takohem me ju dhe bindjen më të thellë se momenti në të cilin ne takohemi, është një moment thirrje kushtrimi për secilin prej nesh, për çdo shqiptar, mbasi shoqëria shqiptare, populli i Selenicës, i Vlorës i Shqipërisë përjeton në një farë mënyre një nga momentet absolutisht më dramatike të historisë tonë kombëtare.

Përjeton një moment në të cilin ne jemi pakësuar dhe po pakësohemi, jemi shkretuar dhe po shkretohemi me një shpejtësi të pabesueshme. Ne mblidhemi në një moment kur me statistika 38% e qytetarëve të Vlorës kanë braktisur Vlorën gjatë 9 viteve të fundit. Ne mblidhemi në një moment kur me statistikë të saktë, 34 % e shqiptarëve kanë braktisur Shqipërinë për BE-në dhe vende të tjera.

Kurrë në histori, një komb në një hark kohor kaq të shkurtër, nuk është shkretuar siç po shkretohemi ne shqiptarët, dhe po të kemi parasysh se 80% e të larguarve nga Shqipëria janë të rinj, kjo e thellon edhe më shumë dramën, katastrofën tonë, mbasi e vërteta është se të humbasësh 80% të rinjve, ke humbur një gjeneratë të tërë dhe më shumë se një gjeneratë.

Është në detyrën tonë, në detyrën e çdo demokrati e demokrate, të çdo qytetari pa parti por edhe të çdo socialisti që e do këtë vend, të bashkohemi të ndalojmë këtë rrokullisje të madhe, të bashkohemi sepse nuk ka asnjë shkak natyror që ne të braktisin këtë tokë të bekuar.

Të bashkohemi dhe të shtrojmë pyetjen, pse ne po ikim në këtë mënyrë, çfarë po ndodh me Shqipërinë e shqiptarët./ CNA