web counter
LEXO PA REKLAMA!

SHKARKO APP

App Store
Google Play

E fundit!

x

Raporti i DASH për Shqipërinë/ Boçi: Panorama e zezë e qeverisë së kalbur

21 Mars 2023, 08:54, Politikë CNA
Raporti i DASH për Shqipërinë/ Boçi: Panorama e zezë
Nënkryetari i PD-së, Luçiano Boçi

Nënkryetari i PD-së, Luçiano Boçi, ka komentuar raportin e DASH, i cili tregonte qartazi se si Shqipëria është e nxirë nga korrupsioni dhe mediat e kapura.

Në reagimin e tij në rrjetet sociale, Boçi shkruan se ky raport ka rrëzuar një qeveri të kalbur, e cila po qëndron në pushtet me forcën e parave të pista dhe shpërdorimi të çdo resursi shtetëror sa herë që ka procese zgjedhore.

“Raporti i DASH tregoi Shqipërinë e vërtetë! Drejtësi jo e lirë! Korrupsion i frikshëm! Media të kapura!

Babëzia dhe egoja e sëmurë e Edi Ramës për të kapur çdo pushtet dhe kufizimi i çdo mediumi për të thënë i lirë dhe i pavarur atë që sot po ndodh në Shqipëri, po e çojnë vendin në zgrip të kufizimit të demokracisë si kurrë më parë.

Raporti i Departamentit Amerikan të Shtetit praktikisht ka rrëzuar një qeveri të kalbur që qëndron ende në pushtet me forcën e parave të pista dhe shpërdorimit të çdo resursi shtetëror sa herë që ka procese zgjedhore”, shkruan Boçi.

Më tej, Boçi citon raportin e DASH ku thuhet se presioni politik, frikësimi, korrupsioni dhe burimet e kufizuara e penguan gjyqësorin të funksiononte në mënyrë të pavarur dhe efikase.

Ndër të tjera, thekson se korrupsioni ishte i pranishëm në të gjitha degët dhe nivelet e qeverisjes.

“A ka sot Shqipëria drejtësi të pavarur ashtu siç parashikohet në kushtetutë?  “Presioni politik, frikësimi, korrupsioni dhe burimet e kufizuara e penguan gjyqësorin të funksiononte plotësisht, në mënyrë të pavarur dhe efikase”, thuhet në raportin e DASH.

"A ka sot korrupsion në të gjitha nivelet e qeverisjes? "Korrupsioni ishte i pranishëm në të gjitha degët dhe nivelet e qeverisjes, përfshirë edhe prokurimin publik dhe partneritetet publiko-private", thuhet në raportin e DASH”, vijon Boçi.

Në përmbyllje të reagimit të tij Boçi shkruan se kjo është panorama e zezë që ka projektuar Rama dhe pushtetarët e tij dhe që duhet ndryshuar.

“Kjo është panorama e zezë e një Shqipërie që është e bukur vetëm për Edi Ramën dhe pushtetarët e tij. Kjo është Shqipëria që nuk bën progres! Kjo është Shqipëria që ka ëndërruar Edi Rama në projektin e tij për të rikthyer diktaturën në çdo qelizë të shoqërisë shqiptare! Kjo është Shqipëria që duam të ndryshojmë! E nisim ndryshimin nga qytetet tona”, shkruan Boçi./ CNA.al





Lajmet e fundit nga