web counter
LEXO PA REKLAMA!

SHKARKO APP

App Store
Google Play

E fundit!

x

"Korrupsioni galopant falimenton Bashkinë Vorë"/ PD, thirrje SPAK-ut

21 Mars 2023, 10:49, Politikë CNA

"Korrupsioni galopant falimenton Bashkinë Vorë"/ PD, thirrje

Kandidati i PD-së për Bashkinë e Vorës, Indrit Hoxha, ka denoncuar vjedhjet që po bëhen në Bashkinë e Vorës.

Hoxha i ka bërë thirrje SPAK-ut të zbarkojë në zyrat e bashkisë për të hetuar tenderat korruptivë.

Sipas Hoxhës, bëhet fjalë jo për lekë xhepi, por për 11 procedura prokurimi me vlerën e 14 milion eurove.

“Në cilësinë time si kandidat i Partisë Demokratike dhe i koalicionit opozitar 'Bashkë Fitojmë', i drejtohem sot zyrtarisht Bashkisë Vorë, Kontrollit të Lartë të Shtetit dhe institucioneve të tjera, me kërkesën për informacion, për disa tendera të zhvilluara në Bashkinë Vorë gjatë katër viteve të fundit.

Shpresoj që këto institucione të bëjnë detyrën dhe të reagojnë me transparencë dhe përgjegjshmëri për tenderat përkatës.

Në të kundërt, mospërgjigjja dhe mungesa e transparencës, do të konsiderohen si përpjekje dhe pjesëmarrje në mbulimin dhe fshehjen e korrupsionit që është bërë me këta tendera.

Bëhet fjalë, jo për lekë xhepi, por për 11 procedura prokurimi me vlerën e 14 milion eurove.

Si kandidat për Bashkinë e Vorës dhe si qytetar i Republikës, u bëj thirrje SPAK-ut dhe organeve të drejtësisë shqiptare t’i hetojnë këta tendera korruptivë, të cilët qartësisht janë bërë jo për punë, por për të vjedhur, sepse këta shpikin punë, jo për t’i bërë, por për të grabitur fondet. Për të futur duart në xhepat e qytetarëve të Vorës, në arkën e shtetit e ku t’u dalë.

Organet e drejtësisë e kanë për detyrë të mbrojnë çdo qindarkë të taksave të qytetarëve nga abuzimi, vjedhja dhe korrupsioni, shtetëror apo privat.

Vora në katër vitet e fundit është simbol i krimit dhe keqqeverisjes lokale të Edi Ramës. Për katër vite ka ndryshuar pesë kryebashkiakë, e megjithatë asnjë hetim nuk është kryer, asnjë kryebashkiak nuk ka shkuar përpara drejtësisë për abuzimin dhe vjedhjen e hapur që u kanë bërë qyetarëve të Vorës.

Vora ka potenciale të mëdha zhvillimi. Është porta hyrëse e Tiranës, 10 km larg saj, por duket sot si një cep i humbur i Shqipërisë, vetëm e vetëm se taksat janë vjedhur, vetëm e vetëm se paratë e qytetarëve kanë përfunduar në xhepat e pushtetarëve.

Kësaj situate, organet e drejtësisë duhet t’i japin fund. Ua kanë borxh qytetarëve të ndershëm të Vorës. Korrupsioni galopant në Vorë e ka falimentuar bashkinë, dhe asnjë insitucion nuk ka ndërhyrë për të dënuar personat përgjegjës, për t’u kthyer qytetarëve dinjitetin e një qeverisjeje të mirë.

Prandaj i bëj thirrje SPAK-ut të zbarkojnë në zyrat e Bashkisë Vorë dhe të marrin në kontroll një gropë të zezë ku humbin paratë e taksapaguesve, prindërve, punëtorëve dhe njerëzve të punës së kësaj zone.

Me 14 maj, u premtoj të gjithë qytetarëve të Vorës, pa dallim partie e bindje politike, se vjedhjes dhe korrupsionit do t’i vijë fundi dhë një periudhe e re do të fillojë për ta dhe për qeverisjen lokale, në të mirë të njerëzve dhe zhvillimit të zonës.

Të gjithë personat që kanë abuzuar me paratë e tyre, e kanë vendin para drejtësisë dhe aty do të përfundojnë!

Së bashku fitojmë!”, shprehet Hoxha./ CNA.al





Lajmet e fundit nga