E fundit!

15:38 Aktualitet

Goditi protestuesin në Zvërnec/ Ndryshon masa e sigurisë për një nga punonjësit e sigurisë së kantierit

Gjykata e Apelit ka ndryshuar masën e sigurisë për një ng...

Edvin Kulluri ia dredh Bashës

3 Korrik 2024, 19:41, Politikë CNA

Edvin Kulluri

Edvin Kulluri ka qenë një nga kritikët më të mëdhenj të Lulzim Bashës gjatë kohës që ai drejtonte Partinë Demokratike.

Kulluri ka fajësuar Bashën për humbjet në seri dhe për përçarjen e PD-së. Megjithatë, pas vitesh sulme, Kulluri hyri në “shtratin” e Lulit.

Basha i dha një post sekretari dhe Kulluri nga një “armik i përbetuar” u kthye në një nga ushtarët e tij.

Por pas humbjes së vulës me vendimin e Gjykatës së Apelit, ai duket se ia ka dredhur sërish Lulit.

Kulluri, në një dalje televizive këtë të mërkurë kërkoi të mos cilësohej si mbështetës i Bashës.

“Ajo që unë dua të refuzoj prej vitesh është se nuk duhet të flasim më Basha - Berisha, Berisha – Basha, Rama - Meta, Meta-Kryemadhi. Jo, duhet të flasim për PD-në se kështu tregojmë mungesë respekti për anëtarët e kryesive të partive, për personalitet publike të partive, se unë nuk jam as i Bashës dhe as i Berishës, kam mbajtur qëndrimet e mia ndër vite”, u shpreh ai.

Madje, Kulluri propozoi që grupimi i Bashës të krijojë një parti të re, ku të mos jetë kryetar Luli. Ai deklaroi e Basha po e humb gjithmonë e më shumë terrenin tek e djathta, ndaj drejtimi i partisë së re duhet të jetë kolegjial.

“Duhet të ulemi të gjejmë një zgjidhje për vijimësinë e këtij grupimi politik. Për këtë kam menduar se partia duhet bërë sa më shpejt, por nëse rrimë në dyzimin rekurs – parti, kam përshtypjen se nuk do të arrijmë askund. Partia nuk do fjalë, do akte konkrete. Duhet të mbledhim 3 mijë firma siç e kërkon ligji, të shkojmë në gjykatë dhe të fillojmë. Mbi të gjitha që është shumë e rëndësishme është se kjo srukturë nga pikëpamja formale siç e kërkon ligji nuk ekziston më, pra duhet të nisim lojën nga fillimi dhe duhet të gjejmë dhe formulën. Unë duke qenë se shoh që ky protagonizëm personal i kryetarëve gjithmonë e më shumë po e humb terrenin tek e djathta, kam dalë me propozimin tim për drejtim kolegjial. Mbase shumica nuk mendon kështu”, theksoi ai.

Kështu, Kulluri ka ndryshuar sërish qëndrim dhe ka dalë kundër Bashës./ CNA