Mashtrimi i radhës i Veliajt/ Tha se ura e Babrroit do të hapet në Qershor, punimet s’kanë mbaruar

3 Korrik 2024, 17:56, Politikë CNA

“Ura e Babrroit që lidh Tiranën me Kamzën do të hapet për automjetet në muajin Qershor.”

Ishte kjo deklarata e bërë nga kryebashkiaku Erion Veliaj në 23 Maj, teksa inspektonte punimet. Asokohe, ai tha se ndjehej i lumtur që Kamza dhe Tirana ishin bashkuar në infrastrukturë.

“Mezi pres që ta hapim në fund të qershorit, që të gjithë ata që do të shkojnë mes Kamzës dhe Tiranës, Babrrusë, Paskuqanit gjatë verës, të ndihet një lehtësim. Kërkoj bashkëpunimin nga banorët edhe kur të kemi prishje, sidomos për prishjet e ndërtimeve pa leje, që siç shikohet tani janë bërë vërtet pengesë. Na rroftë që kemi bërë urën, se në momentin që përballemi me ndërtime pa leje në anën tjetër, sigurisht që do t’i trajtojmë sipas rregullave të shpronësimit dhe të rindërtimit, por edhe ata duhet ta pranojnë se qyteti nuk mund të pengohet”, deklaroi Veliaj.

CNA ishte këtë të mërkurë (3 Korrik) pranë urës së re të Babrroit për të parë më nga afër ecurinë e punimeve dhe nëse kjo vepër vërtetë ka ndihmuar në lehtësimin e qarkullimit të automjeteve.

Mashtrimi i radhës i Veliajt/ Tha se ura e Babrroit do të hapet

Ura e Babrroit, burimi CNA

Siç shihet edhe nga pamjet, punimet jo vetëm nuk kanë përfunduar siç premtoi kryebashkiaku, por duhet ende kohë që ura të jetë funksionale. Qarkullimi vijon në urën e vjetër, e cila nuk mundëson që dy automjete në kahe të ndryshme të kalojnë në të njëjtën kohë, por ato duhet të presin semaforin në të dyja anët e urës së vjetër për të lëvizur, duke sjellë kështu trafik të rënduar në zonë.

Ky është mashtrimi i radhës i kryebashkiakut të Tiranës, i cili shpesh ka bërë deklarata të nxituara për përfundime punimesh, shumë herë për të marrë merita dhe herë të tjera për të treguar që ai punon. Së fundi, inspektimet e tij në vende të ndryshme të Tiranës, kanë qenë pjesë e propagandës, për të fshehur ose zbehur lajmet për vjedhjet e kryera në Bashkinë e Tiranës, nga drejtorët “5D”, të cilët ndodhen pas hekurave.

Ura e Babrroit, burimi CNA

Me herët, Veliaj ka dhënë data të pasakta, për nisje e përmbyllje punimesh, për shumë akse rrugore, për shkolla dhe çerdhe, përfshirë edhe datat për përfundimin e punimeve në Teatrin Kombëtar. Për rastin konkret, nisur edhe nga pamjet në terren, i bëjmë një pyetje të thjeshtë kryebashkiakut: Qershori ka kaluar, kur përfundon ura e Babrroit?!/ CNA