Denoncimi i fortë i PD-së/ Bashkia Tiranë ndryshoi vendbanimin e qytetarëve për vota

28 Maj 2023, 11:20, Politikë CNA

Denoncimi i fortë i PD-së/ Bashkia Tiranë ndryshoi vendbanimin e

Anëtarja e Këshillit Kombëtar të PD-së, Silvi Bardhi, ka denoncuar skemën e manipulimit të votave në Tiranë ditën e zgjedhjeve vendore.

Bardhi në një deklaratë për mediat ka zbuluar se si drejtori i Bashkisë Tiranë, Fatjon Dhuli, dhe miku i tij Hysni Karaj kanë dhënë me qira 3 apartamentet e tyre në njësinë administrative nr.7 për 8 banorë.

Këta banorë, Bardhi thekson se rezultojnë të jenë nga qendra administrative e Bërxullës dhe Vorës, nga Babrroi i Kamzës, Bathorja dhe Librazhdi.

Anëtarja e Këshillit është shprehur më tej se Dhuli është justifikuar se këtyre personave që u ka dhënë shtëpitë i ka të afërm.

“Erion Veliaj, Edi Rama dhe e gjithë banda kriminale e batërdisë zgjedhore, të cilët pushtuan qendrat e votimit, janë ideatorët dhe urdhëruesit e tjetërsimit të votës në Tiranë dhe në të gjithë vendin.

Administrata shtetërore si një polici elektorale zbarkoi në çdo cep të Shqipërisë duke intimiduar, blerë, shantazhuar apo penguar shqiptarët të votojnë të lirë.

Ne disponojmë prova dhe fakte dhe tashmë këto dëshmi ndodhen në SPAK.

Prova dhe dëshmi janë publikuar si kurrë ndonjëherë 'live' edhe në media teksa gazetarët raportonin.

Në sytë e medias fleta e votimit u fut në kuti pa kaluar më parë në vendvotim, në sytë e medias listat e partisë – shtet qëndronin në tavolinën e Komisionit ku mbahej shënim çdo person i detyruar për të votuar, në sytë e medias grupe të strukturuara orientonin votuesit se për kë duhet të votonin.

Është po media e cila ka zbuluar një tjetër skandal të manipulimit të votave në Tiranë.

Emisioni investigativ 'Piranjat' ka zbuluar rastin flagrant dhe të pakundërshtueshëm të drejtorit të Bashkisë Tiranë Fatjon Dhuli dhe mikut të tij Hysni Karaj, të cilët pak ditë përpara mbylljes se afatit ligjor kanë dhënë me qira 3 apartamentet e tyre në njësinë administrative nr.7 për 8 banorë, të cilët janë me pasaportizim në njësinë 7, por që nuk kanë banuar asnjë ditë në këto apartamente.

8 banorët rezultojnë të jenë nga qendra administrative Bërxullë e Vorës, Babrroi i Kamzës, Bathorja dhe Librazhdi.

I kapur në gënjeshtër nga media, Drejtori i Veliajt, Fatjon Dhuli është justifikuar se i ka të afërm, ndërsa miku i tij Hysni Karaj nuk u kujtoheshin qiraxhinjtë. I gjendur nën presion Drejtori i Veliajt dhe miku i tij ka kërcënuar gazetarët.

Kjo është dëshmi e mekanizmit të manipulimit të votave në Tiranë. Mekanizëm i ndjekur kokë e këmbë nga paniku i humbjes së thellë të Veliajt.

Për këtë fakt, Drejtori i urdhëruar nga Erion Veliaj, Fatjon Dhuli, dhe miku i tij Hysni Karaj si shërbëtorë të votës së vjedhur duhet sot të jenë përpara drejtësisë.

Erion Veliaj si vjedhës, manipulues dhe marifetxhi i votave është kandidat qelie për krimin elektoral të ndodhur më 14 maj dhe korrupsionin galopant që ka kapur Bashkinë e Tiranës.

Ai është përgjegjës për deformimin e vullnetit të lirë të qytetarëve të cilët jetojnë çdo ditë në trysninë e gjobave bashkiake, taksave të larta dhe vjedhjes së tyre ditën për diell.

Opozita nuk do të ndalet, por do të denoncojë çdo ditë e në vazhdim të gjithë krimin elektoral të 14 majit. Vota e lirë dhe e ndershme është kusht për rikthimin e pluralizmit dhe demokracisë në vend”, tha ajo./CNA.al