E fundit!

17:32 Politikë

Zbulohet propozimi i PS-së për Reformën Territoriale/ Ja në sa bashki pritet të ndahet vendi

Mbledhja e Komisionit të Posaçëm për Reformën Administrati...

Debate në Këshillin Bashkiak të Tiranës/ PD: S’e dimë kush drejton bashkinë, jemi njohur me dokumentet nga mediat

3 Prill 2025, 21:20, Politikë CNA

Debate në Këshillin Bashkiak të Tiranës/ PD: S’e

Këtë të mërkurë është zhvilluar për herë të parë mbledhja e Këshillit Bashkiak të Tiranës, pa praninë e kryebashkiakut tashmë të arrestuar Erion Veliaj, ndërsa zëvendësohej nga kryetarja e komanduar Anuela Ristani.

Në nisje të mbledhjes anëtarja e Këshillit Bashkiak të Tiranës nga PD, Ilda Zhulali, tha se janë njohur nga media me dy urdhëra lidhur me shkarkimet dhe emërimet në bashkinë e parë të vendit, ndërsa kërkoi të njihej me shkresën zyrtare se kush drejton sot bashkinë dhe kush firmos në mungesë të Veliajt, i cili ndodhet në paraburgim.

“Kemi kërkuar me shkrim, dy kërkesa. E para të na vihen në dispozicion shkresat me firmën e Erion Veliajt se kush e drejton sot Bashkinë e Tiranës. Nga mediat kemi mësuar për dy urdhëra, një që është i muajit shkurt ku emërohet Anuela Ristani dhe një tjetër në muajin mars që emërohet Sara Goxhaj. Nuk e di pse nuk vjen kjo shkresë, që është detyrim ligjor, që ne të njihemi se kush e drejton sot Bashkinë e Tiranës”, tha Zhulali.

Si kundërpërgjigje kryetarja e Këshillit Bashkiak, Romina Kuko tha se duhet t’i bëjnë kërkesë sekretarisë së këshillit për më shumë informacion, ndërsa Zhulali tha se e kanë ndjekur këtë procedurë dhe ende nuk janë njohur zyrtarisht me shkresën.

“Sekretaria më informon që disponon të gjithë informacionin e nevojshëm, kështu që mund t’i drejtoheni sekretarisë në çdo moment”, tha Kuko.

Në vijim nëkryetari i këshillit bashkiak, Dorian Teliti bëri kërkesën e ripërsëritur për ngritjen e komisionit për kontrollin e brendshëm finaciar. Demokrati tha se kjo kërkesë është refuzuar nga socialistët, pavarësisht insistimit të opozitës.

“Përsëris për të 100 herë ngritje e Komisionit për kontrollin e brendshëm finaciar, sidomos në situatën që jemi sot. Një situatë e cila është anormale, e përkohshme dhe kjo e bën akoma më të rëndësishme ngritjen një orë e më parë. Nuk e kuptoj se nga çfarë druheni dhe nga çfarë keni frikë”, tha Teliti.

Demokratët ndër të tjera e cilësuan si antiligjore dhe anormale gjendjen në të cilën ndodhet Këshilli Bashkiak./ CNA