Programi i PD-së për kulturën/ Berisha: Dyfishojmë buxhetin dhe ulim taksën e librit

3 Prill 2025, 14:18, Politikë CNA

Programi i PD-së për kulturën/ Berisha: Dyfishojmë buxhetin

Kreu i Partisë Demokratike, Sali Berisha, tha sot PD-ja synon të bëjë ndryshime të mëdha në fushën e artit dhe kulturës, pasi situata aktuale është emergjente. Berisha ndau edhe një pjesë të Programit të partisë për Kulturën.

Në fjalën e tij, nga selia e PD-së, Berisha tha se kultura do ketë ministrinë e vet, me misionin më të rëndësishëm të zhvillimit, konsolidimit të mbrojtjes të kulturës kombëtare.

Berisha u shpreh se arti dhe kultura kanë nevojë urgjente për një transparencë të plotë për të gjitha fondet, që do të vendoset më 11 maj.

Berisha shtoi se mbështeten artistët dhe njerëzit e kulturës, të letrave dhe do të lehtësohen taksat mbi librin.

“PD zotohet t’i kushtojë një rëndësi parësore artit dhe kulturës si elementë më thelbësorë të identitetit tonë kombëtar.

Ne shqiptarët, një komb plurireligjioz, në rast se të tjerët kanë identitet besimin fetar, ne identitet kombëtar kemi kulturën dhe gjuhën. Dhe nuk është e rastit që kjo shpërfillje e madhe që i bëhet kulturës dhe artit, të kenë prapamendim, të ketë synim pikërisht identitetin kombëtar.

Ndaj dhe jam këtu për të garantuar artistët dhe të gjithë botën e artit dhe të kulturës, se qeveria e ardhshme do të adaptojë një qëndrim totalisht transformues të kësaj situate.

Së pari, kultura do ketë ministrinë e vet. Kultura është në gjendje e imagjinoni vetë ju. Një ministër antikulture që bën betejë me trashëgiminë, me kulturën e vendit.

Pra, do ketë një Ministri Kulture me misionin më të rëndësishëm të zhvillimit, konsolidimit të mbrojtjes të kulturës kombëtare.

Drejtuesit e institucioneve kulturore do të zgjidhen nga vetë punonjësit. Do të jenë më të mirët e më të mirëve.

Imagjinoni ju se çfarë batërdie është bërë me drejtimet. Merrni operën dhe baletin sa herë ia ka ndryshuar drejtuesit. Të gjitha në funksion të parave.

Arti dhe kultura kanë nevojë urgjente për një transparencë të plotë për të gjitha fondet. Dhe i garantoj se borde që vendosin transparencë të plotë do funksionojnë menjëherë pas 11 majit.

Meritokracia dhe nxjerrja e këtij sektori jashtë konfliktit të interesit, do jenë bazë e reformës.

Reforma në sistemin e arteve dhe të kulturës duhet të angazhohet në një reformë të thellë të burimeve të financimeve të këtij sektori.

Qeveria do rrisë kontributin, do dyfishojë buxhetin për kulturën dhe artin.

Kjo nuk mjafton.

Qeveria do të mundësojë me ligjet më të mira të sponsorizimit kontributin e sektorit privat në sponsorizimin e veprimtarive private, kulturore dhe artistike.

Qeveria angazhohet për një bashkëpunim kombëtar. Pra, kultura është çështje e identitetit kombëtar.

Qeveria angazhohet të mbështesë artistët dhe njerëzit e kulturës, të letrave, të librit, shqiptarët kudo që ndodhen.

Një transformim rrënjësor i legjislacionit në fushën e artit, kulturës dhe librit.

Ju nuk mund të imagjinoni taksat që janë të vendosura mbi librin, të cilat e largojnë me kilometra librin nga lexuesi për shkak të çmimeve të larta që imponojnë.

Rikthimi i detyrueshëm për të gjitha bibliotekat publike për të pasur librat që publikohen të autorëve shqiptarë, por edhe të autorëve të huaj.

Një përpjekje e madhe do bëhet për promovimin e librit, i cili po syrgjynoset. Nuk ka asnjë mbështetje, përkundrazi ka vetëm barriera të mëdha fiskale dhe të tjera”,-tha Berisha./CNA