“Bandat e Vuçiçit në veri të Kosovës”/ Berisha, thirrje urgjente NATO-s

1 Gusht 2022, 08:33, Politikë CNA
“Bandat e Vuçiçit në veri të Kosovës”/
Sali Berisha

Kreu i PD-së, Sali Berisha, ka reaguar pas incidenteve dhe tensioneve në veri të Kosovës.

Përmes një postimi në rrjetet sociale, Berisha i cilëson këto akte, si skenar ruso-serb, për të ndezur konfliktin në rajon, ndërsa i bën thirrje NATO-s, të marrë të gjitha masat për një përgjigje të merituar ndaj Putinit të vogël të Ballkanit.

‘Bandat e Vuçiçit në veri të Kosovës bllokojnë rrugët dhe shkrehin breshëri armësh kundër policisë!

Miq, ashtu sikundër paralajmëroi, serbomadhi Vuçiç mobilizoi bandat serbe dhe të infiltruar nga Beogradi kundër aplikimit të reciprocitetit nga qeveria e Kosovës, në përputhje me marrëveshjet e Brukselit.

Duke mbështetur qeverinë e Kosovës në qëndrimin e saj për vendosjen e reciprocitetit me Serbinë, dhe ligjit në tërë territorin, dënoj me ashpërsinë më të madhe këto akte, si skenar ruso-serb, dmth Putin-Vuçiç, për të ndezur konfliktin në rajon.

Nga ana tjetër, i bëjë thirrje NATO-s të marrë të gjitha masat për një përgjigje të merituar ndaj Putinit të vogël të Ballkanit’, shkruan  Berisha./E.T-CNA.al

Lajmet e fundit nga