E fundit!

13:05 Aktualitet

Kallëzohet në SPAK Edi Rama

Grupi Parlamentar i PD-së kallëzon në SPAK Edi Ramën për v...

"News24" s’është prona e Irfanit, por e shqiptarëve

20 Gusht 2025, 13:28, Opinione Arsen Rusta

Irfan Hysenbelliu

Po ti pse flet, kur s’flasin ata që punojnë aty për të drejtat e tyre? Ç’të duhet ty se një koleg apo kolege s’e ka marrë rrogën, kur ti e ke marrë për vete?

Po le ta zgjidhin vetë.

Po, po, po.

Keni të drejtë, na falni, por paga e një kolegu nuk është vetëm një e ardhur e munguar për të. Është një deformim tregu, që sot a nesër, duke lejuar këto standarde, të gjithë jemi të cenueshëm. Pastaj, ja të ndalemi një çast. Një gazetar, reporter, operator kameraman apo punonjës i medias që nuk zgjidh dot shqetësimin e tij kryesor – pagën e mbajtur padrejtësisht – sa i besueshëm është teksa proteston për lirinë e medias?

Të nderuar,

Është moment jo i lehtë, është fiks për të mos qenë më të shtirur. Liria e medias nuk matet me mure, me godina apo të ndalet nga presione.

Ajo është e pakufij kur një gazetar e një media janë të besueshëm. Janë korrektë, zbatojnë ligjet, paguajnë faturat, detyrimet, japin pagat e paguajnë sigurimet.

Çdo çedim nga këto i bën gazetarin e median aspak të besueshme. E bën fiks partnere të kleringut, e bën përfituese të gjërave që s'i meriton, dhe për një çast i humb sa hap e mbyll sytë. Po, po, fitimet e padrejta janë ato që zgjasin pak ose shumë pak.

Z. Irfan,

Ju vërtet jeni pronar, por jo pronar i "News24". Ajo logo, ajo sigël, ai emër është pronë e shqiptarëve.

Ju po, jeni pronar, por pronar i biznesit, i cili njihet me emrin Focus Media News, pra i këtij emri e NIPT-i.

Kërkesa ime si gazetar, i cili dikur ka kontribuar për "News24", me një emër tjetër tregtar, mos gaboj Edisud SPA, është:

Paguani pagat stafit punonjës në media

Paguani sigurimet

Paguani detyrimet

Ujë, drita apo ç’mund të jenë

Dhe nëse vërtet jeni në pamundësi financiare me kompanitë tuaja, atëherë dijeni se ky është keqmenaxhim. "News24" është një aset kombëtar që vlente e vlen më e pakta 20 e kusur milionë euro.

Mos gaboj, në 2012 e bletë diku te 6-7 milionë euro, e si mundet të përfundojë "News24" në një markë pa vlerë?

Si mundet të fiket "News24", jo pak, por 10 ditë, sepse ka një konflikt godine të ditur e stërditur e gjykuar jo një, por disa herë?

I nderuar biznesmen,

Media po, është biznes, ama është edhe përgjegjësi sociale. Ju mund ta akuzoni shtetin nga mëngjesi deri në darkë. Bëjeni, e luajeni fenë, është një shtet me mijëra probleme. Ama është një shtet që po paguan pagat, pensionet e po qëndron ekonomia, sado problematike.

Riktheni dinjitetin e "News24", zgjidhni problemet me të tretët dhe faturat. E do shohësh që do keni sërish një media, e cila do ta bëjë qeverinë t’i dridhen leqet.

Të ketë frikë se kur të dalë shkelja e ligjit në "News24" s’do ta mbyllë as me një zarf, as me një telefon, e as me disa muaj ujë e drita të papaguara apo mbyllje syri për tatim-taksa.

Media e lirë, koleg, nuk trembet as nga policia, as nga ushtria e as nga taksidari.

Por media e lirë që s’jep pagat është thjesht një Media Low Cost, pra fasoneri shfrytëzimi!