Në vend të epilogut...

27 Qershor 2025, 16:22, Opinione Elisabeta Musta

Në zgjedhjet që sapo kaluam në respekt të kontributit tim dhe të familjes sime në PD vendosa të pranoj pozicionin e anëtares e më pas kryetares së KZAZ 39, edhe pse dilemat nuk më mungonin( koha që do t’i merrja profesionit, familjes, djalit tim maturant këtë vit).

Sigurisht që rrugëtimi nuk ishte i lehtë, me eksperienca që vështiroheshin sa më shumë afrohej dita e 11 majit. Për fatin tim puna në ekip shkoi shumë mirë falë dinamizmit, qytetarisë e integritetit të anëtarëve të shkëlqyer të KZAZ Albanës, Indritit, Arjonës, Arbrit, Dashit etj.

E pastaj 11 maji erdhi. Një ditë që zgjati fiks 24 orë në lëvizje, nga ora 6:00 e 11 majit deri në orën 6:00 të datës 12. Ditë intensive ku nuk munguan debatet me militantë kokëbosh në oborret e shkollave, kërkesa llogarie nga lart, orë të zgjatura në këmbë, bashkëpunim me policinë për të faktuar në 2 raste fotografimin e votës. E kur u duk se gjithçka mbaroi, normalisht me përjashtim të rezultatit zgjedhor që sa vinte e ravijëzohej e shkaktonte tek unë mërzi deri në shpërthime të qarash, gaboja.

Numërimi ishte kalvari i vërtetë i KZAZ-ve. Përplasje me fodullëkun e arrogancën boshe të kandidatëve për deputetë të të 2 poleve politike, keqardhje për numëruesit e operatorët që po punonin me orë të tëra nën presion të dyfishtë nga ana e KZAZ dhe e vëzhguesve mediokër të kandidatëve.

Këta rreshta janë pikërisht për ta, për heronjtë e heshtur e të pavlerësuar të këtyre zgjedhjeve, për Evin, Gertin, Erionin, Xhorxhian, Jetmiren, Benardin, Primanin etj. Për ata që qëndruan rreth 3 ditë në tavolina, me pushime pak minutëshe sa për t’u ushqyer, në ambientet e një palestre pa ajrim e pa ajër të kondicionuar, për ata që u shpjegonin me durim çdo vlerësim vote vëzhguesve mistrecë përtej kordonit të sigurisë.

Kam pritur mbi 40 ditë për këto fjalë, prita me durim rinumërimin për të vërtetuar zyrtarisht atë që e dija mirë që në orët e para të 12 majit. Ju ishit dhe jeni më të mirët, qëndrestarët, lexuesit më të ndershëm e më të vëmendshëm të votës. Faleminderit nga zemra për bashkëpunimin.

Në fund 2 fjalë për ata që mund të na kenë kritikuar, sharë, gjykuar për procesin e numërimit në KZAZ.

Ne ndoshta nuk ishim të përsosur, por këtë punë e bëmë me besnikëri, përgjegjësi maksimale, edhe pse me zemër të thyer nga rezultati. Kjo tabelë kur votat lëvizin me shifra minimale vërteton pikërisht këtë. Për ata të pakënaqurit që mendojnë ndryshe janë të lutur herën tjetër të gjejnë, nuk di ku, një ekip më perfekt./ CNA