Bamka

25 Qershor 2025, 08:01, Opinione Ilir Levonja

Bamka
Kur e pyetën në një studio televizive se, syzet që mbante ishin shumë të shtrenjta, Bamka iu përgjigj se, ''të shtrenjta vërtetë, por i shkojnë formatit tim''. Se çfarë formati kishte në mendje Bamka, nuk është e vështirë ta kuptosh, ai i përket sojit më provincial shqiptar që i marrin titujt apo çmimet, pra i marrin, nuk ua japin, si e si t'ia bëjë bam komshia, madje ky të zbukurojë muret (ashtu si komsolasit gjoksin) me tituj plagjiature, dekoratë bronzi të kallur vetëm e vetëm për pordhë, jo se i përket gjindjes së studiuesit, shtetarit reformator, apo ligjvënësit të nderuar që e bën një rregullator social për të mirën e komunitetit jo për halenë. Një ish-president tjetër shqiptar, kur e qortuan se po shkonte në një takim të lartë me kostumin e garderobës, mbase të dhëndërisë, madje i propozuan një firmato batjava, pavarësisht se vlera e kostumit kalonte shumën e pagës së dy viteve bashkë, ai nuk e pranoi sepse nuk u shkonte këllqeve të vendit të tij të varfër.

Ky ishte Rexhep Mejdani një socialist me tituj, por që nuk gëzonte prona pa fund, si i ''djathti'' i madh Bamka që njëzetë e kusur vite mes demokratëve, ndreqi vetëm bythën e vet. Dhe thonë që ka bërë një palë saraje diku rrëzë Dajtit, por kjo nuk të habit aspak për politikanë provincialë. Bamka ka qenë president i Republikës së Shqipërisë me investimin total të Sali Berishës, madje ka qenë krahu i djathtë i Sali Berishës, mirëpo ndodhi 21 janari i 2011 ku makineria televizive asokohe opozitë dhe që pavarësisht një mijë e një standardeve të prishura të një shtypi profesional, i binte pushtetit me gjithëfarësoj intrigash, (qeveriste Berisha me Metën) aq sa e dëshironte me çdo kusht rrëzimin e tij. Kamerat e fshehta ishin në stilin e Sigurimit të Shtetit, apo komsolasve të kuq, të cilët natën u fusnin armët fretërve françeskanë, të nesërmen herët shkonin i bastisnin duke i dërrmuar si komplotistë. Kësaj politike me intrigë, i ranë pre plot shtetarë, ministra dhe zëvendëskryeministra etj. I tillë ishte edhe rasti Meta-Prifti që solli produktin e 21 janarit 2011, me 4 viktima në bulevard, nga ku i gjithë faji iu ngjesh Saliut, as Metës jo, aq sa sot shqiptarët e propagandës të mbysin për fyti edhe pse gjatë qeverisjes së tyre vranë mbi 7 mijë dhe internuan 35 mijë njerëz.

Një shans i madh për një opozitë, një pushtet absolut opozitar as sot nuk ke gjasa ta ëndërrosh, pasi kanale televizive shqiptare mund të shkatërrohen brenda 24 orëve nëse e kalojnë kufirin dhe i prishin humorin Enver Hoxhës, siç edhe keni rastin e "Agon Channel" apo TV të tjera që u blenë brenda natës si "ABC", "Ora News" etj. Bamka sot i del në krah kësaj kaste shtetërore enveriste dhe ashtu si shumë gjela nga bregu i lumit të Shkumbinit, çirren e grricen se fajin e ka Saliu. Raca e ish-berishistëve është raca më antishqiptare, jo pse i dalin kundër Berishës apo opozitarizmit të sotëm që sipas tyre nuk frymëzon, po sepse s'e kanë për gajle që të djegin gjithë Shqipërinë për bythën e vet. Bamka bëri edhe një parti dhe nga njëmijë e një zgjedhës që pati mori vetëm një, sallatorin e Enverit, aq sa për të brejtur trungun e demokratëve. Ky ish-berishisti tjetër Agron Shehaj, sapo ia rrethuan biznesin me shiritin e verdhë, ndërroi drejtim me takt se gjoja autoriteti i Berishës nuk frymëzonte, do merrte 8 deputetë ku të kishte grupin e vet parlamentar, por si përfundim mori pallën e Enverit dhe garancinë që tatimorët nuk do t'i vinin më shiritat e sekuestrimit etj.

Ish-berishisti tjetër, euroatlantiku, Luli fluturues, një milioner në miniaturë, i cili gjoja donte PD të pastër, nuk bëri asgjë më shumë veçse brejti trungun e fortë të demokratëve. Bamka me syze të një formati të lartë, edhe pse po i afrohet të 70-ave, na kujton të gjithëve budallenj, kërkon të mendojmë si thotë ai nga sarajet poshtë Dajtit. Por ta dini, ky provincial politikan shqiptar, pavarësisht benefiteve të demokratëve, kryetar partie, kryetar i grupit parlamentar, ministër Bujqësie etj., më 11 maj 2025 votoi për Edi Ramën, jo për demokratët. Inatin e provincialit e nxjerr veç vakia, se provinciali mendon vetëm për bythën e vet./ CNA