E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Në mirëbesim... është problem truri!

20 Qershor 2025, 10:05, Opinione Ardi Stefa

Lexoj, dëgjoj, madje edhe vetë jam nga ata që shkruaj herë pas here për “vakuumin politik”; “krizën e sistemit politik”, “mungesën e opozitës”, “regjimin autokratik”, “qeverinë jolegjitime të narkoshtetit”, etj., etj.

Budallallëqe. Asgjë nga këto nuk vlen.

Thjesht kemi një qeveri që e ka zgjedhur me votë populli sipas procedurave legjitime që parashikon Kushtetuta. Normalisht kjo quhet Demokraci.

Se si tjetërsohet Demokracia dhe vota e lirë është tjetër gjë.

Nuk e ka fajin demokracia e as politika nëse qeveria konsumohet në gjykata apo ministra të saj burgosen për korrupsion aktiv apo pasiv. Nuk e ka fajin demokracia e as politika nëse në PD gjysma nuk e pëlqen gjysmën tjetër, nëse PD u nda në shtatë apo tetë parti të tjera brenda një viti. Nuk e ka fajin demokracia nëse nëpër studio televizive analistët këpusin kumbulla dhe shumë politikanë na neverisin faktin që kemi votuar dhe pendohemi që s’e marrim dot votën mbrapsht. Nuk e ka fajin as demokracia nëse disa e kanë ngatërruar politikën me çmendinën.

Normalisht duhet të kuptojmë që është e pamundur të kemi edhe “regjim” edhe “vakuum politik”.

Sigurisht që ka shumë njerëz që kërkojnë dhe pretendojnë diçka më të mirë për veten e tyre. Kjo nuk është as problem e as përbën ndonjë problem.

Të gjithë qytetarët shqiptarë kanë të drejtën që të krijojnë parti, shoqata, orkestra, ansambël, trupa teatrore dhe të kërkojnë publik që t’i duartrokasë. Edhe Berisha, edhe Rama, edhe Basha, edhe Agroni, edhe Lapaj me Shabanin, edhe Shehi me Alibeajn, edhe Noizi me Stresin, edhe Çiljeta me Fevziun e fevzinjtë...

Nëse do të gjejnë spektatorë, duartrokitës e ndjekës është çështje tjetër.

Sikundër nuk është serioze të pretendosh që “nuk ekziston opozita”. Natyrisht që ekziston. Thjesht aq është në gjendje të bëjë. Është ashtu siç e donin vetë liderët e opozitës, siç u investua nga Rama, i cili mund të mburret se këtë opozitë e ka investimin më të suksesshëm.

Opozita shqiptare kaq është në gjendje të bëjë. Ky është problemi i saj. Nuk ua ka askush fajin që janë refraktarë, të mykur, pa ide e të pareformuar edhe në burime njerëzore. Fajin nuk ua ka “sistemi” apo kundërshtarët.

E dini cili është problemi i opozitës?

Nuk është as Berisha, as Shehaj, as Basha, as Alibeaj, Qorri apo Lapaj.

Është polifonia, e cila shumë kollaj shndërrohet në kakofoni, apo përçartje analogjikisht me atë që flet, i cili shkon në një stad saqë askush nuk dëgjon se çfarë thotë tjetri. Është edhe iluzioni se qytetarët shqiptarë zgjohen çdo mëngjes me merakun se mos ikën Rama e nuk vjen Berisha.

Nuk është kështu. Qytetarët shqiptarë kanë meraqe dhe probleme të tjera në jetë më serioze se hallet e Ramës apo Berishës.

Problemi i vërtetë nuk është “inekzistenca e opozitës”, por boshllëku që kanë në mendje të gjithë ata që ulërasin dhe bëjnë yhurmë në boshllëk. Një trazirë e shëmtuar. Kjo ndoshta nuk është problem individual politikani, partie apo demokracie. Nuk është as problem i ndonjë ansambli, orkestre apo trupe teatrore.

Është problem truri dhe fatkeqësisht atje askush nuk mundet të ndërhyjë!.../ CNA