Nga bullizimi i Ramës te kërcënimet e Veliajt/ Beti Njuma leksion Kryeministrit, apeli për kolegët

6 Korrik 2022, 14:13, Aktualitet CNA

Nga bullizimi i Ramës te kërcënimet e Veliajt/ Beti Njuma leksion

Gazetarja Beti Njuma ka komentuar sjelljen e kryeministrit Edi Rama në raport me gazetarët, pasi së fundi ai dënoi me “riedukim” për tre muaj një gazetar.

Në një postim në rrjetet sociale, Beti Njuma risjell në vëmendje të tjera raste që sipas saj Rama ka bullizuar gazetarët.

Po ashtu ajo thotë se është kërcënuar personalisht edhe nga kryetari i Bashkisë së Tiranës, Erion Veliaj.

Më tej, ajo i drejton edhe një mesazh kolegëve, ndërsa thekson se reagimi është i vonuar.

Dy ditë më parë gazetarët, në fakt një pjesë fare e vogël e tyre, dolën në protestë kundër kryeministrit Rama dhe masës ndëshkimore që ai mori kundër një kolegu me “riedukim”, që në gjuhën e Kryeministrit do të thotë përjashtim nga konferencat për shtyp që ai jep dhe e drejta për pyetje.

Nuk është hera e parë që kryeministri Rama përdor këtë standard për gazetarët që nuk thonë atë që ai do, që nuk mendojnë si ai dhe bëjnë pyetje që nuk i pëlqejnë. Riedukimi ka prekur më parë shumë kolegë të cilëve Edi Rama u ka bojkotuar studiot, që nga Sonila Meço e deri tek unë, Beti Njuma.

Unë prej tre vitesh jam në riedukim sepse kryeministrit nuk i ka pëlqyer një status i imi në facebook. Ai madje ka ndaluar çdo përfaqësues të PS të shkelë në studion time.

Kolegët tanë kanë qëndruar indiferentë ndaj këtyre sjelljeve kryeministrore, kanë heshtur për mesazhet kërcënuese ndaj meje të kryetarit të Bashkisë Veliaj. Shoqatat e gazetarëve kanë pasur reagime sporadike, të vakta, ose në rastin më të keq asnjë reagim, duke berë që situata të përkeqësohet. Me heshtjen e tyre kanë fuqizuar qëndrimet jo transparente, fyese, bullizuese dhe përjashtuese të kreut të qeverisë.

Zoti Kryeministër ka marrë mandat për të qeverisur Shqipërinë, jo për të bërë edukatorin e punonjësve të medias, apo më keq akoma prokurorin, policin dhe gjykatësin.

Dy ditë më parë gazetarët shqiptarë reaguan ndaj këtij absurditeti. Do të duhej ta kishin bërë më herët. Megjithatë më mirë vonë se kurrë!”-shkruan Beti Njuma./CNA.al

Lajmet e fundit nga