A na nxit alkooli që të tjerët të na duken më tërheqës nga sa janë në realitet?

22 Shtator 2023, 08:11, Kuriozitete CNA

A na nxit alkooli që të tjerët të na duken më

Foto ilustruese

Amerikanët i quajnë "beer goggles" (syze birre). Është një term që i referohet idesë se kur pimë alkool, ka më shumë gjasa që t’i shohim të tjerët si tërheqës.

Por a është vërtet kështu? Disa studime janë përpjekur që t’i japin përgjigje këtij pretendimi, dhe rezultatet nuk kanë qenë asnjëherë shteruese.

Tani një studim i ri ka arritur në përfundimin se nuk ekziston efekti i “syzeve të birrës”.

Përkundrazi, ka shumë të ngjarë që kur jeni të dehur, të jeni më të prirur që ta lini veten të shoqëroheni me ata që ju pëlqejnë tashmë kur ishit esëll. Gjetjet e këtij studimi u botuan në “Journal of Studies on Alcohol and Drugs”.

Në dallim nga studimet e mëparshme, studimi i ri i bëri pjesëmarrësit të besojnë se më vonë mund të ndërveprojnë me njerëzit që po “përzgjidhnin” imazhet në fotot dhe videot që shihnin kur ishin esëll, dhe pas konsumit të alkoolit.

“Kjo shtoi sasinë e duhur të realizmit, i cili ka munguar në studimet e mëparshme”-specifikon Rebeka Monk, profesore psikologjie që nuk ishte e përfshirë në studimin në fjalë.

Një guxim i “lëngshëm”

Studiuesit përfshinë në studim 18 grupe miqsh meshkuj (2 në të njëjtën kohë për të rikrijuar ndërveprimin tipik shoqëror të një mbrëmjeje të kaluar me miqtë në bar).

Atyre iu kërkua të vlerësonin se sa tërheqës ishin burrat dhe gratë në foto, si dhe video të ndryshme që u tregoheshin në një ekran.

Në një rast, iu kërkua të pinin vodka dhe lëng boronice, duke arritur një nivel prej 0.08 për qind alkooli në gjak (kufiri maksimal i ligjshëm në Angli).

Në një rast tjetër, iu kërkua të pinin pije freskuese. Rezultatet treguan se pjesëmarrësit nuk i shihnin njerëzit në foto më tërheqës kur pinin alkool.

Ndërkohë kur ishin të dehur, ata kishin 1.71 herë më shumë gjasa të ndërvepronin me ata që i pëlqenin më shumë, sesa kur pinin pije jo-alkoolike.

“Ne pamë se konsumi i alkoolit, rriste atë që ne e quajmë ‘guxim të lëngshëm’, ose dëshirën për të bashkëvepruar me njerëzit që na duken më tërheqës”- shpjegon Monk.

Ndërgjegjësimi

Duke pasur parasysh efektet që ka alkooli tek funksionet e përpunimit të aftësive vizuale dhe njohëse, ka shumë mundësi që rezultatet të ishin të ndryshme në rast se do të rriteshin nivelet e dehjes nga alkooli.

Monk thekson se çdo rast, është e rëndësishme që kur pinë alkool njerëzit të jenë të vetëdijshëm për pasojat. Ata duhet ta dinë se ato mund të jenë të këndshme në një periudhë afatshkurtër, por të dëmshme në atë afatgjatë./ Përshtatur nga CNA