LEXO PA REKLAMA!

SHKARKO APP

E fundit!

x

Realizoi filmin e parë shqiptar me metrazh të gjatë/ Pasuria që i la artit kineasti Kristaq Dhamo

14 Gusht 2022, 16:26, Kulturë CNA
Realizoi filmin e parë shqiptar me metrazh të gjatë/ Pasuria
Kristaq Dhamo, kineasti i mirënjohur shqiptar

Kristaq Dhamo, kineasti i mirënjohur shqiptar mbylli sot përgjithmonë sytë.

Regjisori la pas një pasuri të madhe në artin shqiptar. Dhamo lindi më 20 prill të vitit 1933, në Fier.

Pasi mbaroi liceun artistik “Jordan Misja”, ai vazhdoi studimet në Institutin e Lartë kinematografik në Budapest të Hungarisë.

Kur u kthye në vendlindje, Dhamo filloi të punojë në Film Studio “Shqipëria e Re", ku realizoi filmin e parë shqiptar me metrazh të gjatë “Tana", më 1958. Këtë të fundit e paraqiti si punë diplome në Budapest.

Së bashku me Gëzim Erebarën xhiruan filmat dokumentarë: “Ne u dashuruam me Shqipërinë” (1959); “Ansambli i Këngëve dhe Valleve” (1960).

Filmi i tij i parë që bëri jehonë ishte “Vitet e para” (1965), i cili u nderua me Çmimin e Republikës. Më pas, shkëlqeu me filmat: Mëngjese lufte (1971); “Nga mesi i errësirës” (1978); “Qortimet e vjeshtës” (1981), etj.

Për shumë vite, ai ka qenë drejtor artistik në Film Studio. Dhamo ka dhënë një ndihmë të çmuar në përgatitjen e studentëve të rinj të kinematografisë, me organizimin e disa kurseve profesionale.

Në 1979, atij i është dhënë titulli "Artist i merituar" dhe në vitin 1987 është nderuar me titullin "Artist i Popullit".

Në festivalin e XI-të të filmit shqiptar, në vitin 2000, është nderuar me çmimin e karrierës. Në korrik të 2021-shit u nderua me titullin e lartë “Nderi i Kombit”./ B.A. – CNA.al

Lajmet e fundit nga