web counter
LEXO PA REKLAMA!

SHKARKO APP

App Store
Google Play

Limoz Dizdari - Kadareja i muzikës

16 Shtator 2022, 22:41, Kulturë Agim Xhafka
Limoz Dizdari - Kadareja i muzikës
Kompozitori Limoz Dizdari

Dizdarin si kompozitor e kam njohur qysh fëmijë. Limozin si njeri e njoha kur u bëra burrë. Por brenda vetes ndryja kaq vlerësim për krijimet e Limozit sa në takimin e parë me të m’u zu fryma prej emocionit. Nga që ia pëlqeja shumë këngët dhe nuk besoja se ai ishte njeri si gjithë të tjerët. E përfytyroja jashtëtokësor, si dikush që jeton veçan, aty në vendin e zotave.

Çdo mëngjes sa hap tv e dëgjoj këngë nga më të shpifurat më del nga shpirti: “Po ku je o Limoz Dizdari dhe ju dizdarët e  tjerë?!”

E dija që ai vite e vite jetoi në Ksamil. Se në atë përrallë jetojnë gjenitë, e shpjegoja unë arratisjen e tij nga Tirana. Se atje era tund degën e dafinës, e përkund dhe krijon art bio. Limozi nuk mund ta ketë muzën në Tiranën Kandahar, pa ujë e ajer të pastër, pa qetësi e me zhurma njerëzish nevrikë e borijesh histerike. Arti i tij do valën, pranon dallgën, i avitet reve dhe i këndon horizontit.

Por dhe që atje e dëbuan mafiozët. U duhej për fitim ai truall, nuk mund ta linin për krijim,për argëtim, për edukim. Banditët njohin veç paranë. Ndaj iu sulën pianos, skenës, luleve, notave dhe ua zunë frymën me llaç e tulla, me beton dhe hekur.

Limozi ka hyrë ëmbël në zemrën e çdo shqiptari në ato vite tmerri e dhune. U struk tek ne e na zbuti, na ngrohu, na fisnikëroi. Prej muzikës së tij e ruajtëm pakëz dinjitet e krenari, nuk u shfytyruam në kafshë. Se na mbrojtën notat e Dizdarit.

E kam thënë me vete prej vitesh që Limozi është në muzikë ashtu si Kadareja në letërsi. E ndërsa shkrimtari ynë shkon e jeton në Francë, Limozi banoi më pranë, në Ksamil ku ka det e ku pentagrami shtrohet si qilim pranveror.

E dua shumë muzikën e tij, e kam në makinë, e nxjerr në tv, më kujton të djeshmen, por dhe më pastron ndjenjat. Më bën optimist e krenar se ka ngjyra, ritëm e dritë. Lum si ai vend që e mban në gji. Ndoshta pas ca dekadash Ksamili do ngrejë një muze e turistë nga çdo cep i globit do e vizitojnë këtë perlë nga që për shumë vite këtu jetoi e krijoi Ai, muzikanti i madh botëror. Ai, Limoz Dizdari, pra.





Lajmet e fundit nga