Sot, 22 vite nga sulmi terrorist/ Çfarë ndodhi më 11 shtator në SHBA?

11 Shtator 2023, 08:18, Kosova & Bota CNA

Sot, 22 vite nga sulmi terrorist/ Çfarë ndodhi më 11 shtator

Sulmet e 11 shtatorit të vitit 2001 janë një seri sulmesh të kordinuara terroriste, të udhëhequra nga grupimi terrorist Al Kaeda, kundrejt Shteteve të Bashkuara. Objekte të sulmit ishin ndërtesa të rëndësishme në SHBA, si Kullat Binjake ku ishte vendosur Selia e Organizatës Botërore të Tregtisë në Nju Jork, ndërtesa e Pentagonit si dhe Shtëpia e Bardhë.

Terroristët arritën të shkatërrojnë Qendrën Botërore të Tregtisë në Nju Jork dhe të dëmtojnë rëndë Pentagonin në Uashington. Mijëra qytetarë u vranë në sulmin më të rëndë terrorist në historinë e njerëzimit.

Në sulmin e 11 shtatorit 2001 humbën jetën rreth 3 mijë persona. Viktimat në kullat binjake ishin 2 752, mes tyre 343 zjarrfikës dhe 60 policë. Pjesa më e madhe e viktimave ishin civilë të 70 kombësive të ndryshme.

Sulmi ndodhi mëngjesin e 11 shtatorit ku një aeroplan i rrëmbyer u përplas mbi kullën veriore të Qendrës Botërore të Tregtisë në Nju jork, duke krijuar një çarje të thellë në faqen e ndërtesës dhe duke shkaktuar zjarr.

Po atë mëngjes vetëm pak minuta më vonë, një aeroplan tjetër pasagjerësh u përplas mbi kullën jugore, duke krijuar një zjarr të madh.

Presidenti Bush që ndodhej në Florida, në atë kohë informoi popullin amerikan se vendi kishte përjetuar një sulm terrorist. Ndërkohë, Administrata Federale e Aviacionit pezulloi të gjitha fluturimet, hera e parë kjo që ndodhte në historinë amerikane, të pezullohej transporti ajror.

Vetëm pak kilometra jashtë Uashingtonit, një avion tjetër u përplas mbi ndërtesën e Pentagonit, duke e mbuluar atë në flakë, duke shkaktuar qindra viktima dhe të plagosur.

Në nëntor të vitit 2001, Shtetet e Bashkuara, me sulme të furishme, larguan lëvizjen talebane nga pushteti në Afganistan.

Atë kohë, Afganistani qeverisej nga talebanët, të cilët kishin aleancë me Al Kaedën.

Misioni i SHBA-së, Mbretërisë së Bashkuar dhe vendeve të tjera në Afganistan ishte ta shkatërronin Al Kaedën, ta kapnin Bin Ladenin dhe t’i largonin talebanët nga pushteti.

Amerika dhe aleatët e saj larguan shpejt Qeverinë talebane nga pushteti, por iu deshën dhjetë vjet ta gjenin dhe ta vrisnin Osama bin Ladenin.

Përfshirja ushtarake në Afganistan vazhdoi me vite, duke u bërë lufta më e gjatë në historinë e Amerikës.

Në vitin 2021, njëzet vjet pas sulmeve të 11 shtatorit, trupat e fundit amerikane u larguan nga Afganistani, derisa talebanët morën sërish kontrollin e këtij vendi.

Pas 11 shtatorit siguria e fluturimeve u rrit dhe u përmirësua shumë në vitet.

Para 11 shtatorit, fëmijët mund të hynin në kabinën e pilotit dhe ta takonin atë. Por, një gjë e tillë u ndalua pas sulmeve, ndërsa dyert e kabinës u siguruan dhe u bënë rezistente ndaj plumbave.

Siguria në aeroportet në mbarë botën u bë, gjithashtu, më e rreptë.

Pas sulmeve të 11 shtatorit, SHBA-ja dhe disa vende të tjera raportuan për rritje të islamofobisë.

Sot, 22 vjet më vonë, në vendin e Qendrës Botërore të Tregtisë - apo siç njihej ndryshe Kullat Binjake - qëndron vetëm një ndërtesë, e njohur si Kulla e Lirisë./ CNA