E fundit!

22:04 Politikë

Ali Ahmeti për protestat: Nuk mbroj Ramën, armiqtë e kombit po krijojnë pasiguri

Kreu i Bashkimit Demokratik për Integrim, Ali Ahmeti, ka r...

Ish-Presidenti Trump mbledh mbi 7 milionë dollarë që nga dorëzimi tek autoritetet në Xhorxhia

27 Gusht 2023, 21:22, Kosova & Bota CNA

Ish-Presidenti Trump mbledh mbi 7 milionë dollarë që nga

Për ish-Presidentin Donald Trump, një fotografi vlen mbi 7 milionë dollarë.

Zyrtarët e fushatës së tij elektorale thanë se ai ka mbledhur fonde prej 7.1 milionë dollarësh që nga dita e enjte kur u regjistrua në Burgun e Qarkut Fulton në Xhorxhia, i akuzuar se planifikoi në mënyrë të paligjshme përmbysjen e rezultatit të zgjedhjeve të vitit 2020 në këtë shtet, duke u bërë kështu edhe ish-presidenti i parë në historinë e Shteteve të Bashkuara që fotografohet nga autoritetet në burg.

Zëdhënësi i fushatës Steven Cheung tha se vetëm të premten se ishin mblodhur rreth 4.18 milionë dollarë, niveli më i lartë i mbledhur brenda një dite.

Shuma rekord e grumbulluar nënvizon se si sfidat ligjore të ish-Presidentit Trump po ndihmojnë fushatën e tij, megjithëse organizata e tij politike po harxhon dhjetëra miliona dollarë për të garantuar mbrojtjen e tij ligjore. Akuzat penale në rritje gjithashtu nuk kanë arritur të dëmtojnë pozitën e tij në garën për zgjedhjet presidenciale brenda Partisë Republikane. Ish-presidenti fiton vazhdimisht ndaj rivalëve të tij me një diferencë prej 30 – 50% në anketime.

Megjithëse ish-Presidenti Trump e cilësoi paraqitjen tek autoritetet të enjten si një “eksperiencë e tmerrshme” dhe tha se nuk pati “një ndjesi të këndshme”, ndërsa qëndronte për t’i bërë fotografinë historike, fushata e tij elektorale përfitoi nga mbledhja e fondeve.

Pa nisur ende udhëtimin për t’u kthyer në Nju Xhersi, fushata e tij elektorale po e përdorte fotografinë për të mbledhur fonde nga mbështetësit. Ish-Presidenti Trump e përforcoi këtë mesazh në median e tij sociale Truth Social, si dhe duke u rikthyer në rrjetin social X, dikur i njohur me emrin Twitter, për herë të parë pas gati dy vitesh e gjysmë, për të shpërndarë fotografinë dhe për t’i orientuar mbështetësit drejt një faqeje në internet për mbledhje fondesh.

Brenda pak orësh, zyrtarët e fushatës kishin qarkulluar gjithashtu një linjë të re produktesh me fotografinë e tij, që filloi me bluza dhe që tashmë përfshin edhe postera, ngjitëse për makinat, mbajtëse gotash dhe filxhanë kafeje.

Zoti Cheung tha se kontributet nga personat që blejnë këto produkte ose që thjesht dhurojnë fondet pa blerë diçka, arritën kulmin në veçanti pas dërgimit të mesazhit nga ish-Presidenti Trump.

Ai tha se me kontributet e reja, përpjekjet e fushatës elektorale për të mbledhur fonde gjatë tre javëve të fundit, kanë arritur në gati 20 milionë dollarë. Në fillim të gushtit, ish-Presidentit Trump u përball me akuza penale në Uashington, për përpjekjet e tij për të përmbysur rezultatin e zgjedhjeve të vitit 2020, në periudhën që i parapriu sulmit të dhunshëm të mbështetësve të tij ndaj Kapitolit.

Në të njëjtën kohë, organizata e tij politike ka harxhuar dhjetëra miliona dollarë për avokatët, ndërkohë që ai përballet me akuza në katër juridiksione të ndryshme. Sipas dokumenteve të paraqitura rishtazi nga fushata e tij elektorale, ish-Presidenti Trump mblodhi mbi 53 milionë dollarë gjatë gjysmës së parë të vitit 2023 – periudhë gjatë së cilës dy çështjet e para penale ndaj tij u shndërruan në një thirrje për mbështetje, që shtoi së tepërmi fondet e mbledhura për të. Komitetet e tij politike kanë paguar të paktën 59.2 milionë dollarë për mbi 100 avokatë dhe firma ligjore që nga janari 2021./VOA