web counter
LEXO PA REKLAMA!

SHKARKO APP

App Store
Google Play

E fundit!

x

Dita e zisë në Serbi/ Provokon ashpër Vuçiç, sulmon Ramën: Nuk është hera e parë që gënjen

28 Shtator 2023, 08:13, Kosova & Bota CNA

Dita e zisë në Serbi/ Provokon ashpër Vuçiç, sulmon

Presidenti i Serbisë Aleksandër Vuçiç ka provokuar ashpër, pasi gjatë një interviste për emisionin “Oko” në RTS është shprehur se, Serbia shpalli Ditë zie për të gjithë të vrarët në Banjskë edhe për serbët e vrarë edhe për policin e vrarë të Kosovës.

Gjithashtu Vuçiç ka sulmuar kryeministrin Edi Rama, pas deklaratës që bëri pas vendimit të Serbisë për shpalljen e Ditës së Zisë.

Presidenti i Serbisë është shprehur se nuk është hera e parë që Rama gënjen dhe se ata kanë shpallur Ditë Zie për të gjithë të vrarët dhe ngjarjet.

“Serbia ka caktuar Ditë zie për ngjarjet tragjike në Kosovë, për vdekjen e të gjithë njerëzve. Nga pikëpamja e Kushtetutës së Republikës së Serbisë, të gjithë janë qytetarë të vendit tonë. Serbia ka ditë zie për tre serbët e vrarë dhe për policin e vrarë. Është një vendim i civilizuar, serioz dhe i përgjegjshëm. Edi Rama nuk po thoshte të vërtetën. Është e vërtetë se komunat serbe në veri të Kosovës kanë shpallur ditë zie për serbët e vrarë. Ne shpallëm ditë zie për të gjitha ngjarjet dhe për të gjithë të vrarët. Nuk është hera e parë që Rama nuk e thotë të vërtetën”, ka deklaruar Vuçiç.

Kujtojmë se Rama më herët reagoi në lidhje me vendimin e Serbisë për të shpallur Ditë Zie për anëtarët e grupit të agresorëve që sulmuan Policinë e Kosovës.

“Zija e shpallur zyrtarisht në Beograd për pjesëtarët e grupit të armatosur që u asgjësuan nga forcat e sigurisë së Republikës së Kosovës, pasi nga ai grup iu mor jeta një efektivi të policisë është sinjali më i keq që Serbia mund t’i jepte rajonit dhe komunitetit euro-atlantik! Në ndërkohën që duhet të kishte hapur një hetim serioz për anëtarët e atij grupi kriminal, lidhjet e tyre me trafikantët e armëve dhe me të tjerë individë apo entitete, në Serbi apo gjetkë, potencialisht të angazhuara në krijimin e një lëvizjeje të armatosur në Veriun e Kosovës, Beogradi me këtë shpallje zije që nuk ka asnjë lidhje me shekullin XXI, i fryn si asnjëherë më parë qysh prej vitit 1999, zjarrit të një konflikti të armatosur!

Kjo është jo vetëm e pajustifikueshme dhe e papranueshme, por e dënueshme me të gjithë forcën e fjalës e të instrumentave në dispozicion të bashkësisë euro-atlantike!

Ky është momenti që Serbia duhet ta ndajë qartë dhe prerë mendjen nëse do të jetë me Europën dhe botën demokratike të shekullit XXI apo me hijen e vetvetes së fundshekullit XX; me vlerat dhe parimet e Bashkimit Europian e të komunitetit euro-atlantik apo me fantazmat dhe me krimet e të shkuarës së saj të palavdishme të viteve ‘90; me të nesërmen europiane të fëmijëve të saj të pafajshëm apo me të djeshmen e fajshme të nacionalizmit vrasës e vetëvrasës!”, tha Rama ndër të tjera./ CNA





Lajmet e fundit nga