web counter
LEXO PA REKLAMA!

SHKARKO APP

App Store
Google Play

Skulptori i Rilindjes

2024-04-02 11:20:00, Editorial Elvi FUNDO
Skulptori i Rilindjes
Kryebashkiaku i Tiranës, Erion Veliaj

Në filmin “Zonja nga Qyteti”, një nga ikonat e Kinostudios së dikurshme, në dialogun midis Violeta Manushit dhe Vasillaq Vangjelit, dy emblema të skenës dhe kinematografisë shqiptare, ka një prezantim në njërën nga sekuencat e filmit.

Kur Violeta e pyet Vason nëse ishte piktor, Vaso i përgjigjej me një gradë më lart, skulptor. Bënte qen, kuaj me çizme meksikane, breshka dhe zhaba në allçi.

Në fakt, kjo skenë filmi na tregon se Erion Veliaj dhe banda e tij e drejtorëve të arrestuar, pjesërisht, pasi ka ende të tjerë të lirë, janë një gradë më lart se piktori, simboli i Rilindjes.

Banda e Erion Veliajt është banda e skulptorit.

Patjetër që është një gradë më lart se ajo e piktorit. Piktorit i kanë rënë shumë dëshmorë dhe Edi Rama ka pasur viktima rrugës, ish-ministra, kryebashkiakë, etj., ndërsa Erion Veliaj, përtej një ministri, është ngritur një gradë më lart se kryeministri, ka ngritur strukturën e tij, njerëzit e tij. SKULPTOR.

Skulptori i Rilindjes
Erion Veliaj

Pse po e quajmë Veliajn skulptor dhe po i japim një gradë më lart?!

Sepse Erion Veliaj ka marrë nga rruga ç’ka mundur, ç’ka gjetur, 99-ça, njerëz që luftuan Partinë Socialiste në 2005-ën, ka marrë nga rruga njerëz pa asnjë kontribut politik, të cilëve u ka dhënë grada, i ka bërë drejtorë, i ka bërë biznesmenë dhe drejtorë, jo në një pozicion, por në disa, duke i qarkulluar.

Kush shërbente më mirë, shpërblehej më shumë. Njerëz që shpikën skemat nga përqindjet e marra nga tenderët kaluan në pronarë të tenderëve dhe përveçse kontrollonin Komisionet e Vlerësimit të Ofertave (KVO) filluan t’i fitonin tenderët vetë.

Dhe këtu nuk përfshihet vetëm Mariglen Qato, nuk është vetëm Redi Molla, janë thuajse të gjithë drejtorët dhe struktura e Bashkisë së Tiranës.

Kjo komandë menaxhuese e Bashkisë së Tiranës është edhe struktura elektorale e Erion Veliajt.

Skema të këtilla për të fituar tenderë, për të emëruar persona pa kontribute politike, për t’i futur më pas në politikë, për ti bërë miliarderë me taksat e shqiptarëve të varfër, janë të qarta skema kriminale, të cilat korrupsionin nga një instrument i thjeshtë përfitimi për xhepat e kthejnë në një instrument më të madh politoko - kriminal, në një grup të strukturuar kriminal.

Skulptori i Rilindjes
Bashkia e Tiranës

Kjo sepse në rastin e Tiranës kemi disa drejtorë që bashkëpunojnë, janë ortakë në të njëjtat subjekte, kontrollojnë komisionet, fitojnë tenderët, ndajnë paratë, shkojnë në fushatë, akuzohen se blenë zgjedhjet, kur i dalin faktet dhe provat kanë dhe kurajën që të bëjnë edhe kallëzime e më pas përfundojnë pas hekurave të SPAK-ut me fakte dhe prova. 

Të gjetur, të emëruar, të komanduar nga SKULPTORI VELIAJ.

Këto fakte dhe prova Erion Veliaj kërkon t’i shmangë me fjalinë se ai nuk është pronar i hotelit në Durrës.

Veliaj, pronari i drejtorëve hajdutë

Po, Erion Veliaj nuk është djali i Ahmadinexhadit, është e vërtetë, ashtu sikundër nuk është me letra pronar i hotelit, por një është e vërteta e madhe:

Erion Veliaj është kryetari i drejtorëve hajdutë të arrestuar nga SPAK-u. Erion Veliaj është kryetari i Bashkisë së Tiranës.

Erion Veliaj është administratori i kryeqytetit, njeriu që administron, që emëron, që shkarkon dhe që vlerëson punën e drejtorëve.

Ka audit, ka struktura, ndërkohë këta hajdutë që SPAK-u i ka pas prangave, Erion Veliaj i qarkullonte sa në një drejtori në një tjetër, nuk i kontrollonte, por i linte të lirë të abuzonin duke qenë në dijeni shumë herë në shumë raste për punën e tyre kriminale, për aktivitetin e tyre korruptiv.

Skulptori i Rilindjes
Fotomontazh - Erion Veliaj, në sfond Bashkia e Tiranës

Ndaj dhe Erion Veliaj ka përgjegjësinë e tij, jo thjesht dhe vetëm morale, siç pretendohet. Ai mund të mos jetë pronari i hotelit, por është drejtori, kryetari, menaxheri, emëruesi i përbashkët i të gjithë drejtorëve të Bashkisë së Tiranës, sepse është ai që i ka firmosur, i ka komanduar, kontrolluar dhe ka ndarë detyrat me ta.

Veliaj ka ndarë korrupsionin me ta, ka ndarë krimin me ta, sepse i ka mbrojtur publikisht, atë që SPAK-u e ka kapur tashmë sepse në Bashkinë e Tiranës gjithçka është zhvilluar brenda dyerve të institucionit dhe  jashtë saj dhe Erion Veliaj ka qenë në dijeni në shumë raste.

Ndaj jemi përballë faktit se Erion Veliaj është skulptori jo piktori. Skulptori Veliaj ka ngritur një gradë më lart vjedhjen dhe korrupsionin me drejtorët e tij hajdutë../ CNA





10:16 Editorial

Stay brave!

After a court decision, the police implemented the ord...

Lajmet e fundit nga