web counter
LEXO PA REKLAMA!

SHKARKO APP

App Store
Google Play

Dokumenti - Duhet të kishin përfunduar/ 4 linjat e termovalorizatorëve në inceneratorin e Tiranës nuk janë ndërtuar ende

2023-05-02 15:26:00, Denoncim CNA
Dokumenti - Duhet të kishin përfunduar/ 4 linjat e
Landfilli i Sharrës

Ndërtimi i landfillit dhe inceneratorit të Tiranës është një nga skandalet më të mëdha të denoncuara nga opozita dhe mediat në Shqipëri.

Ka pasur edhe një komision hetimor parlamentar, një kontratë koncesionare monopoliste 430 milionë dollarë për 30 vite në fillim.

Ndërsa sot, vlera e saj duket se është gati dyfish, duke përllogaritur dhe të ardhurat e kompanisë të deklaruara zyrtarisht në tatime.

Sipas të dhënave zyrtare të siguruara nga CNA, xhiroja e kompanisë llogaritet të jetë 25 milionë dollarë në vit mesatarisht, pra në rreth 30 vite me një mesatare të tillë pa llogaritur asnjë rritje, ndërkohë që popullsia e kryeqytetit pritet të shtohet, shkon te 750 milionë dollarë, të paktën sipas vlerave të deklaruara zyrtarisht.

Pa shkuar më tej te fitimet që këto 5-6 vite shkojnë rreth 30 milionë dollarë, ndërkohë që vetë kompania pretendon publikisht se ka investuar po kaq.

Nga ana tjetër, në një dokument (dhjetor 2022) të publikuar nga CNA, del se kompania, partnerëve të saj u drejtohet me vlerën e investimit deri në atë moment 22 milionë euro, vlera të cilat janë të deklaruara prej saj.

CNA po sjell sot një dokument tjetër për të ndihmuar SPAK-un.

Një pjesë të aneks-kontratës koncesionare, pra asaj që ka firmosur qeveria me kompaninë.

Së pari, ky dokument tregon afatet se si duhet të ishte zhvilluar investimi për ndërtimin e inceneratorit dhe rehabilitimin e venddepozitave ekzistuese në Tiranë.

Kështu, quhet kjo pjesë e aneks-kontratës.

Dokumenti - Duhet të kishin përfunduar/ 4 linjat e
Dokumenti i aneks-kontratës koncesionare

Sipas të dhënave të firmosura nga palët, termovalorizatorët e shndërrimit të mbetjeve në energji do të jenë të përbërë nga 4 linja përpunimi, të cilat do të jenë të ndara në afate të ndryshme kohore për ndërtim.

Kapaciteti i çdo linje përpunimi do të jetë rreth 230 ton mbetje në ditë.

Sipas të dhënave zyrtare, linja e parë është parashikuar të fillojë në muajin 18 të koncesionit, ndërkohë që sot jemi pas gati 6 vitesh e nuk dihet ku është linja, kontrata është firmosur në gusht të 2017-ës.

Ndodhemi në muajin maj, në muajin e 68-të të koncesionit, ku është linja e parë e prodhimit të energjisë?

Këtë duhet të na e tregojë jo vetëm kompania, por edhe SPAK-u, i cili duhet të shkojë atje ta shikojë ku ndodhet ajo dhe 3 të tjerat.

Dokumenti - Duhet të kishin përfunduar/ 4 linjat e
SPAK

Linja e dytë e impiantit është parashikuar të fillojë punë në muajin e 34-t.

Pra, pas dy vitesh e 10 muajsh. Jemi në vitin e 6-të. Linja e dytë nuk ekziston.

Sipas kontratës, shkruhet pëfundimi i linjës së tretë duhet të ishte në muajin e 50-të, pra pas 4 vitesh e dy muajsh. Jemi afër vitit të 6-të dhe sërish nuk ka linjë të tretë.

Secila linjë sipas kontratës do të ketë kapacitetin prej 230 ton në ditë, por e katërta duhet të përfundojë muajin e 72-të. Ne jemi në muajin e 68-të, ende nuk ka filluar ndërtimi i të parës. Nuk ka mbaruar e para, e dyta dhe e treta, e jo më të mund të diskutohet që në muajin e 72-të, pra në gusht, të kemi gati linjën e katërt.

Kapaciteti me dy linja shkon 460 ton dhe me tri linja 690 ton, kurse me katër linja, 920 ton.

Kjo është sipas aneks-kontratës së firmosur nga kompania koncesionare dhe shteti shqiptar.

Këtë mjafton ta shohë SPAK-u, të shkojnë oficerët e BKH-së dhe policisë gjyqësore të bëjnë matjet dhe shikojnë investimet për të kuptuar si qëndron e vërteta e këtij investimi.

Ndërkohë kompania deklaron dhe ka ngritur pretendime se është vonuar leja e ndërtimit apo janë dorëzuar sheshet me vonesë. Në fakt edhe me vonesat e lejes së ndërtimit edhe me pandeminë po ta përfshijmë brenda kompania ka punuar sërish e kontrata qartazi nuk duket të jetë zbatuar.

Ende nuk ka një deklarim zyrtar ku janë paratë, porositë, mallrat, sepse investimi për këto 4 linja të cilat do të prodhonin energjinë dhe do të ishin në një periudhë 6-vjeçare të ndërtuara, nuk janë ndërtuar.

Nga ana tjetër sipas të dhënave zyrtare të shtetit shqiptar, qeveria i ka paguar nëpërmjet fondit të pakushtëzuar që jep për pushtetin vendor 10 milionë dollarë në vit, pra vetëm për Bashkinë e Tiranës në 6 vite paguhen rreth 60 milionë dollarë.

Dokumenti - Duhet të kishin përfunduar/ 4 linjat e
Bashkia e Tiranës

Kujtojmë këtu se i është shtuar landfillit të Tiranës edhe pagesa për mbetjet e Durrësit, me miliona euro, ndërkohë vazhdojnë të paguajnë Kavaja, Vora, të cilat janë përfshirë në bashkitë që paguajnë për landfillin në kryeqytet dhe incenerim, por incenerator nuk ka.

Nga ana tjetër një fakt është edhe ai i të ardhurave që kompania ka siguruar nga biznesi, ku sipas vetë deklarimeve të kompanisë me të ardhura rreth 25 milionë dollarë në vit në 5 vitet e fundit kompania mund të ketë xhiruar një shumë mbi 100 milionë dollarë e cila është dhe diferenca e të ardhurave që vjen nga biznesi privat për shërbimin që ofrohet në landfillin e Tiranës.

Sipas aneks-kontratës të publikuar nga CNA, kontrata koncesionare e përcakton mjaft qartë fazën e investimit ku fillon, si vazhdon dhe sa muaj ekzekutohet.

Aktualisht nuk ka asnjë incenerator, asnjë linjë prodhimi energjie në Tiranë.

Ky është fakt, sot jemi pas gati 68 muajsh, ndërkohë që kontrata është firmosur në gusht të 2017.

CNA do vazhdojë të sjellë të tjera dokumente ekskluzive dhe publike në lidhje me landfillin e Tiranës dhe aferën e inceneratorëve deri në zbardhjen e plotë të çdo detaji në lidhje me këtë kontratë./ CNA.al





Lajmet e fundit nga