web counter
LEXO PA REKLAMA!

SHKARKO APP

App Store
Google Play

E fundit!

x

Kujt po i hap rrugën SPAK-u?

31 Tetor 2024, 14:25, Editorial CNA
Kujt po i hap rrugën SPAK-u?
Foto ilustruese

Një institucion që askush se besonte se në rast të një drejtimi të ndershëm dhe parimor do të kishte të tilla rezultate në luftën kundër krimit dhe korrupsionit.

Një institucion që po shahet dhe po anatemohet se po bëka revolucion në politikë dhe duke i goditur liderët e opozitës, po i shtron rrugën Ramës për të zgjatur pushtetin e tij.

Një institucion që sipas analistëve ka ndërhyrë në politikë, një institucion që po zgjat qeverinë e Ramës po dëmton opozitën që bën goditje selektive, goditje me balancë e kështu me radhë.

Le të shohim disa fakte me gjakftohtësi, t’u japim të drejtë të gjitha atyre që thonë. “Po keni të drejtë”, por përgjigjja është shumë e thjeshtë: A nuk duhej arrestuar Ilir Meta, se jemi 6 muaj para zgjedhjeve kur SPAK ka fakte dhe prova?

Kallëzimet janë aty. Faktet dhe provat janë gjetur. Kush është Ilir Meta e dinë të gjithë. Nuk duhet të ishte nën arrest? Ka gabim në mënyrën e ekzekutimit të urdhrit apo vendimit të Gjykatës? Patjetër, duhet të mbajnë përgjegjësi ata policë për veprimin që kanë kryer.

Ende nuk kanë arritur standardet evropiane, por fakti është fakt dhe në rast se njerëzit do të ishin kundër arrestimit të Ilir Metës qoftë dhe në mbështetjen publike dhe në qoftë se gjyqet apo vendimet do të bëheshin me votimet e popullit, Ilir Meta do të kishte hyrë me kohë në burg. Nuk është e tillë, është ndjekur një procedurë dhe Meta ndodhet atje.

Ish-kryeministri Berisha ndodhet në ballkon, mohon akuzat, godet SPAK-un, ka qëndrimet e tij, por nuk ndodhet në ballkon për shkak se SPAK donte ta arrestonte apo ka shkuar në veprime ekstreme, shkoi pasi nuk ndoqi procedurën e rregullt ligjore.

Kujt po i hap rrugën SPAK-u?
Sali Berisha

Nuk pranoi që të kishte një vendim pa kaluar më parë nga parlamenti dhe kaloi nga një çështje akuzash për korrupsion apo për shpërdorime detyre dhe çështjesh të tjera në një çështje kushtetuese.

Me ikjen e Berishës dhe të Metës sipas analistëve, bie opozita.

Në fakt opozita është në aksion, po vepron çdo ditë, nuk pati ndonjë shqetësim për Metën megjithëse prisnim të vinin mijëra shqiptarë nga e gjithë bota. Më shumë shqetësim ka për Ramën apo ministrat e tij.

Tani SPAK ka goditur vetëm opozitën. Këto dy personalitete të opozitës, Metën dhe Berishën, ku në fakt i pari ka qenë kryeministër i socialistëve në pushtet dhe me Edi Ramën, është ai që e solli në pushtet.

Kujt po i hap rrugën SPAK-u?
Ilir Meta

Nga ana tjetër janë ministra në burg, kryetarë bashkish, ish-zëvendëskryeministri në arrati.

6 kallëzime dhe hetime për kryetarin e bashkisë, Erion Veliaj. Hetime për ministra të tjerë dhe ish-ministra. Qeveria Rama 1 thuajse ka rënë e gjitha. O është në hetim, o është në burg. Kanë rënë deputetë.

Tani kujt po i hap rrugën SPAK-u?

Kujt po i hap rrugën SPAK-u?
Arrestimi i Ilir Metës

Nuk duhet të arrestonte Metën?  Apo të lëshonte Berishën nga ballkoni se janë zgjedhjet.

Në këtë logjikë i bie të mos luftohet korrupsioni kurrë, të mos ketë kurrë arrestime, të presin të mbarojë në mandatin e deputetit dhe t’i marrin.

Po ata qindra e qindra vetë të grupeve kriminale me dosjet e partnerëve të cilët janë arrestuar ata që po hetohen apo dhe ata që kanë marrë arratinë çfarë janë? Apo po u hapin rrugën krimit tjetër, grupit tjetër?

Ndaj dhe këto teza nuk qëndrojnë. Është shumë e thjeshtë, SPAK-u ka bërë detyrën. Mos të presin që të përmbysë botën, por në fakt për Shqipërinë janë çudira të padëgjuara më parë që ish-presidenti, ish-kryeministri, ish-zëvendëskryeministri e të tjerë të arrestohen me akuza për korrupsion.

Ndaj ata që mendojnë se SPAK po i hap rrugën dikujt e ka gabim sepse rruga është e hapur, problemi është i disaanshëm, pengmarrja e opozitës, përçarja e saj pa diskutim korrupsioni politik, pagesa, korrupsioni shtetëror e të tjerë gjithçka tjetër, por SPAK nuk i  ka hapur rrugën askujt. Rrugën në politikë duhet ta hapin vetë, SPAK po lufton krimin dhe korrupsionin.

Sa për standardet duhet t’i qëndrojmë standardit “Dumani”, ato të tjerëve nuk kanë asnjë vlerë. Të shohim, ende ka kohë për të dalë në përfundime, por një gjë është e qartë, SPAK nuk po i hap rrugën askujt. SPAK-u po bën thjesht dhe vetëm detyrën./ CNA





Lajmet e fundit nga