web counter
LEXO PA REKLAMA!

SHKARKO APP

App Store
Google Play

E fundit!

x

Kush na futi në BE, Rama, Putin-i apo Berisha?

16 Tetor 2024, 10:38, Editorial CNA

Kush na futi në BE, Rama, Putin-i apo Berisha?

Më në fund BE u zgjua. Europa e mplakur, e përçarë, burokrate, e korruptuar, e mbyllur, e mpakët, e lodhur dha një dritë jeshile dje, një dritë që vjen shumë vonë ndaj Shqipërisë.

Ndoshta, gjithçka duhet të ishte kryer rreth 12 apo 13 vite më parë. Nuk ndodhi kështu. U shty pafundësisht. Kushtet ndryshuan sipas viteve, interesat klanore politike të brendshme të BE sollën jo pak pasoja për Shqipërinë.

Një vend i vogël, si Shqipëria apo Maqedonia e Veriut, Ballkani Perëndimor, i cili është një popullsi disa herë më e vogël se disa vende të tjera që janë pjesë e BE-së, por që kanë problematika edhe më thelbësore se këto vende.

Ajo që pamë dje duhet të kishte ndodhur më pare, siç theksuam, por më në fund s’kemi çfarë themi, hapim një proces.

Pse u hap ky proces?

Gjithmonë ka një pse, duhet të pyesim. Dikush është skeptik, dikush është pozitiv por për hir të së vërtetës, fjala e kryeministrit Edi Rama ishte e vërtetë, ishte goditëse për BE-në. Qeveria ka një mijë probleme, ndoshta ka plotësuar apo jo kushtet, duhet tjetër frymë.

Hapja e kapitujve, hapat e shpejtë drejt BE-së duhet të kenë një frymë bashkëpunimi më të gjerë të klasës politike. Në BE nuk mund të shkojë vetëm shumica, e cila drejton vendin, pasi një shumicë më e madhe shqiptarësh se ajo, nuk votojnë apo votojnë opozitën, ndodhet jashtë vendit e kështu me radhë.

Ndaj duhet një frymë tjetër. Por gjithsesi, Rama tha shumë fjalë të sakta. Jo vetëm për vonesën që BE e ka bërë pa arsye ndaj Shqipërisë, por dhe faktin se, fatkeqësisht ndoshta është Putin-i, lufta e Rusisë me Ukrainën, tronditjet e themeleve të BE-së nga kjo luftë të cilat i bëjnë burokratët e zyrave të Brukselit të kthejnë sytë nga Ballkani Perëndimor, të kthejnë sytë nga Shqipëria.

Një herë të bashkojnë Shqipërinë me Maqedoninë e Veriut, një herë  t’i ndajnë, pastaj të vendosen më vete e kështu me radhë.

Qeveria mund të ketë bërë pak, aspak apo shumë për integrimin. Korrupsioni ka probleme, zbatimi i ligjit gjithashtu, pa folur për ndërhyrjet në Kushtetutë, në ligj, Gjykata Kushtetuese, vite të tëra pa institucione drejtësie, reforma, e cila në fakt lë shumë për të dëshiruar,i përjashto SPAK-un, segmente të caktuara të kësaj strukture, pjesa tjetër e reformës është ulëritëse, e dështuar, e korruptuar.

Ndaj Qeveria ka ende punë, jo vetëm ajo, parlamenti, gjërat duhen bërë nga të gjithë bashkë.

Rama e tha të vërtetën e tij, atë të vërtetën e burokratëve, të vërtetën e BE-së, e cila ndoshta hapi negociatat tashmë sepse ndodhi lufta në Ukrainë.

Nga ana tjetër Edi Rama do të marrë shpatën edhe një herë për situatën duke thënë se në 2030 do hyjmë në BE këtë e bëri Rilindja, PS-ja, sikundër dhe kanë thënë edhe pa u hapur negociatat pasi ato i kemi shpallur si fitore disa vite rresht me ardhjen e Rilindjes në pushtet.

Së treti pretenduesi ynë i integrimit në BE është Sali Berisha, i cili thekson se ka bërë çdo reformë, ka bërë shtetformim, ka bërë punë të mëdha në Shqipëri dhe Edi Rama e ka lënë vendin pas.

Tani çështja është shumë e thjeshtë. Rama është në pushtet, ka bërë të tijën.

A na fut dot vetë ai në BE? Patjetër për kontributin e kryeministrit dhe qeverisë nuk do të hynim në BE.

A ka bërë Reforma Berisha? Ka dhe ai kontributin e tij pa asnjë diskutim.Por e vërteta më e madhe sërish është ajo që tha Kryeministri.

Nëse nuk do të kishim luftën në Ukrainë dhe këtë konjekturë në BE ndoshta dyert do t’i kishim ende të mbyllura. Jo për fajin tonë, por për faj të BE-së.

Ndaj më shumë sesa një grindje kush është me më shumë merita lë t’i ndajnë sipas votave të shumicës dhe pakicës, por një meritë të madhe ka dhe lufta në Ukrainë.

Pra, Putin dhe Rusia siç tha Edi Rama detyroi BE-në të kthejë sytë nga Ballkani Perëndimor, ndoshta dhe veprimet e Ramës me Ballkanin e Hapur e të tjera si këto, por më në fund e kthyen kokën për të parë vërtetë që Shqipëria ka nevojë të integrohet, Ballkani Perëndimor ka nevojë të integrohet dhe jo të lihet në duart e lojërave të pista të Rusisë apo të braktiset nga zyrtarët burokratë të BE-së.

Dhe, për ta mbyllur, për ata që janë më optimistët dhe skeptikët ndoshta kur të hyjë Shqipëria në BE, Bashkimi Evropian mund të jetë më i copëtuar më i vogël, mund të mos ekzistojë, mund të ketë një format tjetër, por një gjë është e sigurt, BE është vendi ku shqiptarët kanë admiruar, kanë adhuruar dhe ëndërruar të shkojnë këtu e më shumë se 25 vite më parë./ CNA





Lajmet e fundit nga